Россияда мамлакатдан ташқаридаги ҳисоб рақамларга чет эл валютасини киритиш тақиқланди
Тақиқ 2022 йил 1 мартдан кучга киради.
Россия резидентларига мамлакатдан ташқаридаги банк ҳисоб рақамларига чет эл валютасини киритиш тақиқланди. Бу ҳақда Россия Президенти матбуот хизмати хабар берди.
Маълум қилинишича, Россия Президенти Владимир Путин 1 мартдан бошлаб Россия Федерацияси резидентлари томонидан ўз ҳисоб рақамларига ёки хорижий банклардаги омонатларига чет эл валютасини ўтказишни тақиқлаган.
«2022 йил 1 мартдан бошлаб резидентлар томонидан Россия Федерацияси ҳудудидан ташқарида жойлашган банкларда ва молия бозорининг бошқа ташкилотларида очилган ҳисобварақларига (депозитларига) чет эл валютасини киритиш, шунингдек хорижий тўлов хизматлари провайдерлари томонидан тақдим этилган электрон тўлов воситаларидан фойдаланган ҳолда банк ҳисобварағи очмасдан пул ўтказмаларини амалга ошириш тақиқлансин», дейилади хабарда.
Аввалроқ Facebook ва Twitter Украинага қарши ташвиқот олиб борган ботларни блоклагани хабар қилинганди. Шунингдек, Россияга қарши санкцияларнинг глобал иқтисодиётга хатарлари ҳақида хабар берилди.
