Россиялик миллиардерларнинг Ғарб санкцияларидан қочишга уринаётгани аниқланди
Ҳали чекловларга дуч келмаган бизнесменлар ҳам ўз мулкларини яширишга ҳаракат қилмоқда.
Россиялик миллиардерлар яхталар, самолётлар ва бошқа кўчар мулкларни аниқлаш қийинроқ бўлган мамлакатларда яшириб, Ғарб санкцияларидан қочишга ҳаракат қилмоқда. Бу ҳақда Reuters АҚШ Адлия вазирлиги махсус гуруҳи раҳбари Эндрю Адамсга таяниб хабар берди.
«Яхталар ва самолётлар кўринишидаги кўчар мулкни юрисдикцияларга кўчиришга уринишлар бўлмоқда (уларнинг баъзилари оммага эълон қилинган). Менимча, одамлар уларнинг эгаликларини текшириш ва эгалик ҳуқуқини музлатиш қийинроқ бўлади, деб ҳисобламоқда», — деди Эндрю Адамс.
Бундан ташқари, гап ҳали чекловларга дуч келмаган, аммо бунга ҳозирданоқ тайёргарлик кўраётган ишбилармонлар ҳақида бормоқда. Расмийнинг огоҳлантиришича, санкциялардан қочишга интилаётганлар Россия элитасининг ноқонуний даромадларини кузатиш учун халқаро ҳамкорликнинг «тарихдаги энг юқори» даражаларига дуч келади.
«Миллиардерларнинг активларини кузатиш кўпинча қийин, чунки улар дунё бўйлаб тарқалган қобиқ компаниялари қатламлари орқасида яширинган, аммо бугунги кунда АҚШ прокурорлари ҳатто бир вақтлар хавфсиз бошпана ҳисобланган мамлакатлардан ҳам маълумотларни олади», — деди Адамс.
Аввалроқ АҚШ россиялик бизнесменларни санкцияларни четлаб ўтишга уринишдан огоҳлантираётгани хабар қилинганди. Шунингдек, Мэн ороли россиялик миллиардерларнинг саккизта самолётини рўйхатдан чиқаргани ҳақида хабар берилди.