Россияликлар Украинадаги операция фонида банкоматлардан 111 млрд рубль нақд пул чиқариб олди
Россияликлар пандемия бошланган 2020 йилда ҳам йирик миқдордаги пулларни нақдлаштирганди.
Россияликлар Украинадаги ҳарбий операциянинг биринчи кунидаёқ банкоматлардан 111 миллиард рубль нақд пул чиқариб олди. Бу ҳақда «РБК» хабар берди.
Маълум қилинишича, Россия ҳарбийларининг Украинадаги махсус операциясининг биринчи кунида россияликлар бутун мамлакат бўйлаб банкоматлардан 100 миллиард рублдан ортиқ нақд пул чиқариб олган. Бундан олдинги энг катта қиймат — 175 миллиард рубль — 2020 йил март ойида, пандемия бошланганида қайд этилган.
Украинада махсус ҳарбий операция бошланган 24 февраль куни Россияда муомаладаги нақд пуллар ҳажми 111,3 миллиард рублга ошди. Бу 2020 йилнинг 27 мартидан бери энг юқори ўсиш бўлди, ўшанда пандемия авж олиши ва Президент Владимир Путиннинг йирик депозитлардан олинадиган фоиз даромадларига солиқ жорий этиш таклифи фонида 174,9 миллиард рубль миқдорида нақд пул чиқариб олинганди.
Қайд этилишича, Путиннинг 22 февралдаги Донецк ва Луганск мустақиллигини тан олиш ҳақидаги қароридан сўнг муомаладаги нақд пуллар ҳажми бор-йўғи 1,9 миллиард рублга ошган.
Президентнинг Донбассда ҳарбий операция бошлаш ҳақидаги шошилинч мурожаатидан сўнг рубль кескин тушиб кетди — 24 февралда доллар курси 90 рублга яқинлашди, евро 100 рублдан ошди. Марказий банк рубль курсини барқарорлаштириш учун валюта интервенциялари бошланганини эълон қилди.
Натижада Россиянинг йирик банклари мижозлари банкоматлардан нақд пул ечиб олишда муаммоларга дуч келди: банкноталар етишмади ва узун навбатлар юзага келди. Кредит ташкилотлари вакиллари нақд пул тақчиллиги тизимли хусусиятга эга эмаслигига ишонтириб, банкоматларни ўз вақтида тўлдиришга ваъда берди.
«Эксперт РА»нинг валидация департаменти бошқарувчи директори Юрий Беликовнинг сўзларига кўра, 24 февраль куни нақд пулга бўлган талабнинг энг юқори чўққиси кузатилган. У «ахборот фони» туфайли яқин кунларда нақд пул олиш ҳажмининг ошиши кутилиши мумкинлигини тан олди, аммо талаб анча тез барқарорлашишини таъкидлади. Беликовнинг таъкидлашича, Россия банкларида аҳоли ва бизнеснинг нақд пулга бўлган эҳтиёжларини қондириш учун етарли даражада юқори ликвидли активлар мавжуд.
Аввалроқ Россиянинг санкцияга учраган банк карталари Apple Pay ва Google Pay’да ишламаслиги хабар қилинганди. Шунингдек, Россиялик миллиардерлар Украинадаги ҳарбий амалиётлар туфайли қанча бойлик йўқотгани ҳақида хабар берилди.
