Ғарбнинг «блокловчи» санкциялари остида қолган Россия банклари янги Visa ва Mastercard карталарини чиқара олмайди. Бу ҳақда «РИА Новости» Россия Миллий тўлов карталари тизими (НСПК) матбуот хизматига таяниб хабар берди.

Ғарб давлатлари Россиянинг Украинани демилитаризация қилиш бўйича махсус операцияси фонида Россияга қарши қаттиқ чекловлар жорий қила бошлади.

Хусусан, АҚШ ҳукумати ва бошқа бир қатор давлатлар Россия банклари: «ВТБ», «Совкомбанк», «Новикомбанк», «Промсвязьбанк» ҳамда «Россия» ва «Откритие» банкларига қарши «блокловчи» санкциялар жорий этилганини эълон қилди. Ушбу банкларга тегишли халқаро тўлов тизимлари карталарининг эгалари улар билан хорижда тўловни амалга ошира олмайди. Бироқ карталар Россияда ишлашда давом этади.

«Ушбу банклар мижозлар фойдаланаётган карталарнинг амал қилиш муддати тугаганидан кейин янги Visa ва Mastercard карталарини чиқара олмайди. Россия банклари томонидан чиқарилган Visa ва Mastercard халқаро тўлов тизимларининг карталари билан мамлакат ичидаги барча транзакциялар ишлашда давом этади. Бундай транзакциялар одатдагидек Миллий тўлов карталари тизими орқали амалга оширилади», дея таъкидлаган НСПК матбуот хизмати.

Қайд этилишича, ушбу банклар мижозларининг барча маблағлари уларнинг ҳисобварақларида қолади ва бундай карталар билан барча операцияларни амалга ошириш мумкин бўлади.

Бундан ташқари, «Мир» карталари билан операциялар тўлиқ ҳажмда амалга оширилади. Уларнинг эгалари Android операцион тизимига эга смартфонларда Mir Pay хизматидан ҳам фойдаланиши мумкин.

Аввалроқ Amazon Visa билан комиссия йиғими бўйича келишмовчилик тугаганини эълон қилгани ҳақида хабар берилганди. Шунингдек, Россияда мамлакатдан ташқаридаги ҳисоб рақамларга чет эл валютасини киритиш тақиқлангани хабар қилинди.