Самарқанддаги «Қизилтурук» олтин кони сотувга қўйилди
Кондан фойдаланиш учун 150 млн доллар инвестиция киритиш талаб этилади.
Самарқанд вилояти Ургут туманида жойлашган «Қизилтурук» олтин кони аукцион савдосига қўйилди. Савдо бўйича тегишли маълумотлар E-AUKSION порталига жойлаштирилди.
Маълумотларга кўра, аукционда иштирок этиш учун аризаларни қабул қилишнинг охирги муддати 2022 йил 14 март соат 9:00 бўлиб, савдо шу куни соат 10:00 да бошланади.
Шунингдек, бинонинг бошланғич нархи 23 миллиард 691 миллион сўм бўлиб, закалат миқдори 2 миллиард 369 миллион 100 минг сўмни ташкил этади.
Қайд этилишича, «Қизилтуруқ» конида олтин қазиб олиш учун ер қаъри участкасидан фойдаланишда қуйидаги талаблар қуйилган:
- ишлаб чиқаришда фойдали компонентларни ажратиб олиш коэффиценти камида 85 фоизли технологик регламентни қўллашни назарда тутиш;
- лойиҳани амалга ошириш учун талаб этиладиган рухсат берувчи ҳужжатларга ижобий хулоса олингандан сўнг бир йил давомида инвестиция лойиҳаси доирасида 20 миллион доллардан кам бўлмаган инвестицияларни жалб қилиш;
- лойиҳани амалга ошириш учун 150 миллион доллар миқдорида инвестиция киритиш;
- кондаги фойдали қазилмаларни лицензия берилган санадан бошлаб 36 ой мобайнида қазиб олиш ва қайта ишлашни бошлаш, шунингдек йиллик қазиб олишни ТИАда кўрсатилган миқдордан кам бўлмаган даражада амалга оширишни таъминлаш;
- қазиш ишлари олиб бориладиган вилоят ва туманда яшовчи аҳоли учун ТИАга мувофиқ иш ўринларини ташкил этиш, бунда яратиладиган иш ўринларининг сони 600 тадан кам бўлмаслигини таъминлаш.
Таъкидланишича, ер қаъри участкасининг майдони 1643 гектардан иборат. Маъмурий жиҳатдан, иш жойи Самарқанд вилояти Ургут тумани ҳудудида, Самарқанд шаҳар марказидан 50 километр жанубдаги Чақилкалон тоғларининг ғарбий учида жойлашган.
Иш майдони кескин кесилган рельефли тоғли ҳудуд бўлиб, мутлақ баландликлари 1000 дан 1600 метргача етади. Водийлар устидаги сув ҳавзаларининг нисбий баландлиги — 200–500 метр. Ҳудуднинг экспозицияси тахминан 80 фоизни ташкил қилади.
Аввалроқ Канада компанияси Ўзбекистон кон соҳасига 6 миллион доллар ажратиши хабар қилинганди. Шунингдек, Навоий кон-металлургия комбинати 3 та корхонага бўлингани ҳақида хабар берилди.