Сардоба фожиасида зарар кўрган тадбиркорларга компенсация тўлаб берилди
Бизнес-омбудсман томонидан киритилган сўровлар натижасида тадбиркорларга 1 млрд 943 млн сўм тўланган
Ўзбекистонда Сардоба фожиаси натижасида зарар кўрган бир гуруҳ тадбиркорларга компенсация тўлаб берилди. Бу ҳақда Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакилнинг матбуот хизмати хабар берди.
Маълум қилинишича, бизнес-омбудсманга Сардоба фожиаси натижасида зарар кўрган бир гуруҳ тадбиркорлик субъектларининг жамоавий мурожаати келиб тушган.
Сардоба сув омборида содир бўлган фавқулодда ҳодиса сабабли етказилган зарарни қоплаш юзасидан бизнес-омбудсман томонидан Сирдарё вилояти ҳокимлигига сўровлар киритилган ва натижада тадбиркорларга 1 миллиард 943 миллион сўмлик компенсация тўлаб берилган.
Маълумот ўрнида, давлат томонидан ушбу мақсадларга 126 миллиард сўмлик маблағ ажратилган. Шунингдек, бизнес-омбудсман ушбу маблағ ҳисобидан Сардоба тошқинидан зарар кўрган фермерларнинг зарарларини тўлаб бериш жараёни бошланганлиги маълум қилган.
Аввалроқ Сардоба фожиасида зарар кўрган тадбиркорларга солиқ имтиёзлари берилиши хабар қилинганди.
