Шимолий кореялик ҳакерлар 2021 йилда қарийб 400 миллион долларлик криптовалюталарни ўғирлади. Бу ҳақда Chainalysis тадқиқот фирмаси ҳисоботига таяниб Bloomberg хабар берди.

Маълум қилинишича, ҳакерлар криптовалюта платформаларига камида еттита киберҳужум уюштирган. Ҳужумлар биринчи навбатда инвестиция фирмалари ва марказлашган биржаларга қаратилган.

Таъкидланишича, жиноятчилар фишинг сайтлари, эксплоитлар (тизимлардаги заифликларни қидирадиган дастурлар), шунингдек, илғор ижтимоий муҳандисликдан фойдаланган.

Қайд этилишича, биткоиннинг ўғирланган активлардаги улуши 20 фоизни ташкил этган. Аксарияти (58 фоизи) эфириумга, яна 22 фоиз — бошқа альткоинлар ва ERC-20 токенларига тўғри келган. Жами ўғирланган криптовалюта миқдори 2020 йилга нисбатан 40 фоизга кўпдир.

«Шимолий Корея бу маблағларни қўлга киритгандан сўнг, у [ҳужумларни] яшириш ва [пулни] нақд қилиш учун эҳтиёткорлик билан ювиш жараёнини бошлаган», — дея ҳисобламоқда Chainalysis’дагилар.

Бундан олдин БМТ Хавфсизлик Кенгаши ва АҚШ кибержиноят Шимолий Кореяга ядро ва ракета дастурларини молиялаштиришга ёрдам берганини маълум қилган.

Ҳисоботга кўра, ўғирланган маблағлар мамлакат ялпи ички маҳсулотининг деярли 1,5 фоизини ва йиллик ҳарбий бюджетнинг қарийб 10 фоизини ташкил қилади.

Аввалроқ Флойд Мейвезер ва Ким Кардашьян криптовалюта билан боғлиқ фирибгарликда айблангани хабар қилинганди.