Space Exploration Technologies (SpaceX) 26 январь, пайшанба куни тарихдаги энг оғир юкка эга Falcon 9 ракетасини учириб, янги рекорд ўрнатди. Бу ҳақда компания сайтида хабар берилди.

SpaceX компаниясининг Falcon 9 қўнишга ва қайта фойдаланишга қодир бўлган ягона ўрта оғирликдаги юкни кўтарувчи ракета ҳисобланади. У Starlink сунъий йўлдошларини ҳамда космонавтларни учириш, Халқаро космик станцияга юк ташиш ва шу каби турли хил миссиялар учун компаниянинг ҳақиқий ишчи кучига айланди.

Маълум қилинишича, биринчи босқичда Falcon 9 ракетасидан аввал саккиз марта фойдаланилган. Янги учириш Тошкент вақти билан соат 14:32 да Флорида штатидаги Канаверал бурнидаги Кеннеди коинот марказининг 40-учириш мажмуасидан амалга оширилган. Ракета умумий оғирлиги 17,4 тонна бўлган 56 та Starlink сунъий йўлдошини Ернинг паст орбитасига олиб чиқди.

Биринчи босқич ҳавога кўтарилгандан сўнг, тахминан, 2 дақиқа 30 сониядан кейин ажралиб чиқиб, Ерга туша бошлаган ва кўтарилишдан саккиз дақиқа 40 сония ўтгач, Флорида қирғоқларидаги платформага хатосиз қўнган.

Кўтарилганидан, тахминан, 55 дақиқа ўтгач, SpaceX сунъий йўлдошлар орбитага муваффақиятли жойлаштирилганини тасдиқлади. Шу тариқа, компания аллақачон орбитага 3,8 мингга яқин Starlink сунъий йўлдошини олиб чиққан.