Американинг SpaceX компанияси Falcon 9 ракетаси ёрдамида Turksat 5B алоқа сунъий йўлдошини орбитага учирди. Бу ҳақда компания сайтида хабар берилди.

Қайд этилишича, ракета 18 декабрь куни АҚШнинг Шарқий соҳиллари вақти билан соат 22:58 да ҳавога кўтарилган. Парвоз Флорида штатидаги АҚШ ҳарбий-ҳаво кучларининг 40-сонли учириш мажмуасидан амалга оширилган.

SpaceX сунъий йўлдошнинг учирилишини YouTube’да трансляция қилди.

Маълум бўлишича, оғирлиги 4,5 тонна бўлган сунъий йўлдош Turksat алоқа операторига рақамли телевидение ҳамда Туркия, Қизил денгиз, Ўртаер денгизи, Шимолий ва Шарқий Африка, Яқин Шарқ ва Форс кўрфазига кенг интернет уланишини таъминлаш учун зарур. Сунъий йўлдош 15 йил давомида хизмат қилиши кутилмоқда.

Аввалроқ SpaceX йиллик парвозлар рекордини янгилагани хабар қилинганди.