Илон Маскнинг SpaceX компанияси Falcon 9 ракетаси ёрдамида Starlink интернети учун яна 49 та сунъий йўлдошни орбитага олиб чиқди. Бу ҳақда компания Twitter’даги саҳифасида хабар бермоқда.

Ракета 18 январь, сешанба куни Шарқий қирғоқ вақти билан соат 21:02 да учирилган. Учириш Флорида штатидаги Кеннеди космик марказидаги 39A (LC-39A) комплексидан амалга оширилган.

Falcon 9 ракетасининг ишлатилган биринчи поғонаси учун бу миссия кетма-кет ўнинчиси бўлди. У Starlink сунъий йўлдошларини, шунингдек, GPS III-3, Turksat 5A, Transporter-2’ни учириш учун ишлатилган.

Дастлаб учириш 17 январь куни эрталаб режалаштирилган эди. Бироқ ноқулай об-ҳаво шароити туфайли уни кечиктиришга тўғри келган.

Учириш муваффақиятли амалга оширилган. Компаниянинг маълум қилишича, сунъий йўлдошлар орбитага етказилган ва ракета поғонаси A Shortfall of Gravitas сув платформасига муваффақиятли қўнган.

Ҳозиргача SpaceX 2042 та Starlink сунъий йўлдошини учирган, бироқ уларнинг ҳаммаси ҳам орбитада эмас ва активлаштирилмаган. Космик парвозлар бўйича таҳлилчи Жонатан Макдауэллнинг ҳисоб-китобларига кўра, 2000 дан ортиқ сунъий йўлдошдан атиги 1495 таси маълум бир орбитада. Шу билан бирга, 15 январь куни Илон Маск Twitter’да1469 сунъий йўлдош фаол эканини, яна 272 таси эса берилган орбиталар томон ҳаракатланаётганини ёзган.

Аввалроқ SpaceX йиллик парвозлар рекордини янгилагани хабар қилинганди. Шунингдек, Илон Маск космосни монополиялаш ҳақидаги айбловларга жавоб қайтаргани ҳақида хабар берилди.