Бизнесни бошлашда тажрибали мутахассисдан маслаҳат олиш анча фойда беради. Танишлари орасида тажрибали бизнесмен дўстлари бўлмаганлар учун қуйида тадбиркорликни бошлашда қўл келадиган китоблар ҳақида сўз боради.

«Барчасини ўзим истагандек бажариб, бизнесни қандай йўлга қўйганим ҳақида», Ричард Брансон

Китобда Virgin Group асосчиси ва Буюк Британиянинг энг бадавлат кишиларидан бири Ричард Брансон олган тадбиркорлик сабоқлари ҳақида сўз боради.

Ишбилармон Virgin’нинг асосий ютуқ ва камчиликлари, кутилмаган ташаббуслари ва уларнинг натижалари ҳақида ҳазил-мутойиба билан гапириб, ўз тажрибасидан муваффақиятли тадбиркор бўлиш бўйича маслаҳатлар билан ўртоқлашади.

«Барчаси қандай бошланганди», Жессика Ливингстон

Ушбу китобда стартаплар учун энг йирик бизнес инкубатор — Y Combinator асосчиси Жессика Ливингстон Apple, PayPal, Yahoo!, Adobe ва бошқа компаниялар ишни қандай бошлагани ҳақида сўзлаб берган.

Ливингстон ўқувчиларни жаҳонга машҳур корпорациялар асосчиларининг интервьюларда ўзини қандай тутганлигини кўришга таклиф қилади, жамоани қандай бирлаштириш ва стартап сифатида инвесторларни қандай топиш мумкинлиги ҳақидаги саволларга жавоб беради.

«Бизнес моделларини қуриш. Стратег ва инноваторнинг қўлланмаси», Александр Остервальдер, Ив Пинье

Китоб бизнес модели учун тайёр шаблон ва ғояни ишлаб чиқишни қаердан бошлаш кераклиги ҳақида батафсил режадир. Остервальдер ва Пинье ғояни тасаввур қилишни ва уни тўққизта қурилиш блокидан иборат бизнес моделига айлантиришни таклиф қилади: мижозлар сегментлари, қиймат таклифлари, тарқатиш каналлари, мижозлар билан муносабатлар, даромад оқимлари, асосий ресурслар, асосий фаолият, асосий ҳамкорлар ва харажатлар таркиби.

Китобнинг катта плюси — бу ҳар бир блок учун батафсил қўлланма ва ҳақиқий компанияларнинг ишларидан мисоллар.

«Нолдан бизнес. Ғояларни тезда синаб кўриш ва бизнес моделини танлаш учун Lean Startup усули», Эрик Рис

Ушбу китобнинг мазмуни бўлган концепция ҳозиргача қайси ғоя ишлаши ва қайси бири вақтни беҳуда сарфлашни аниқлашнинг энг самарали усулларидан бири ҳисобланади.

«Илон Маск каби фикрланг. Иш ва ҳаётда улкан сакраш учун бошқа оддий стратегиялар», Озан Варол

NASA’нинг собиқ муҳандиси Озан Варол замонамизнинг энг машҳур тадбиркорларидан бирини мисол қилиб олиб, астронавтлар ва Илон Маск каби жасур ишбилармонлар томонидан қўлланиладиган муаммоларни ҳал қилиш ва мақсадларга эришишнинг ностандарт усулларини таҳлил қилади.

Аввалроқ миллиардерлар тажрибаси ҳақида 5 та китоб тавсия қилинганди.