Америкалик кинорежиссёр Стивен Спилберг аввалроқ сотувга қўйилган Seven Seas супер яхтасини 158 миллион долларга сотди. Бу ҳақда Bloomberg хабар берди.

Маълум қилинишича, ҳозирда яхта канадалик миллиардер Барри Зекельман билан боғлиқ бўлган Zekelman Investments компаниясига тегишли. Зекельман қувур ишлаб чиқарувчи Zekelman Industries компаниясининг бош директори ҳисобланади. Кема канадалик миллиардер қўлига ўтганидан сўнг «Пўлат одам» номини олган.

Merle Wood & Associates воситачи компанияси веб-сайтига кўра, Seven Seas 2010 йилда қурилган 86 метрли яхтадир. У 20 нафар меҳмон ва 28 нафар экипаж аъзосини сиғдира олади. Яхта, жумладан, лифт, вертолёт майдончаси ва кинотеатр билан жиҳозланган.

Bloomberg май ойида Спилбергнинг режалари билан таниш бўлган учта манбага таяниб режиссёр бошқа яхтага буюртма бергани ҳақида ёзганди. Реал вақт режимида янгиланган Forbes Real-Time рейтингига кўра, Спилбергнинг бойлиги 3,7 миллиард долларга тенг. Зекельманнинг бойлиги эса рейтингга кўра, 2,3 миллиард долларга баҳоланган.

Аввалроқ миллиардер Роман Абрамовичнинг самолёти сотувга қўйилгани ҳақида хабар берилганди.