Таиланд туризм бошқармаси маҳаллий тартибга солувчилар ва криптовалюта биржаси билан рақамли саёҳат токенларини чиқариш учун ишламоқда, деб ёзади Bloomberg унинг раҳбари Ютасаки Супасорнга таяниб.

Унинг сўзларига кўра, бу пандемия туфайли йўқотилган даромаднинг бир қисмини қоплашга ёрдам беради. Қиймат 80 миллиард долларни ташкил этади.

«Рақамли валюталарни жамғариб бойиб кетган одамлар бор ва улар тўпланган бойликдан фойдаланишни хоҳлашлари мумкин. Агар улар бу ерда ўз валюталарини алмаштирмасдан ва давлат солиқларисиз фойдалана олса, қулай бўлади», — дея Ютасакининг сўзларини келтиради нашр.

Бироқ саёҳатчилар Таиландда саёҳат қилишда Bitcoin, Ethereum ва бошқа рақамли токенлардан фойдаланишни бошлаши учун бироз вақт кетиши мумкин. Ҳозирча мамлакат криптовалюталарни қонуний тўлов воситаси сифатида тан олмайди. Бироқ Ютасакининг сўзларига кўра, Туризм бошқармаси ҳозирда туризм бизнеси тиклангунча криптовалютани қабул қилиш учун замин яратмоқда.

Маълумот учун, 2019 йилда Таиландда 40 миллионга яқин сайёҳ дам олди, бу эса мамлакатга 60 миллиард доллардан ортиқ даромад келтирди. Бироқ пандемия сабабли чегаралар сайёҳлар учун бир йилдан ортиқ вақт давомида ёпилди. Фақатгина октябрь ойида мамлакат коронавирусга қарши эмланган сайёҳлар учун очилди.

Аввалроқ Сальвадорда дунёдаги илк криптовалюта шаҳри қурилиши ҳақида хабар берилганди.