Илон Маскнинг Tesla компанияси Formula SAE пойга электромобиллари жамоаларига ҳомийлик қилишни ва уларни бепул аккумуляторлар ҳамда чегирмали ускуналар билан таъминлашни бошлади. Бу ҳақда Electrek хабар берди.

Қайд этилишича, Tesla ушбу Formula SAE танловларида қатнашган собиқ талабаларни кўп бора ишга қабул қилган.

Formula SAE — бу талабалар мусобақаси бўлиб, унда жамоалар пойга автомобили прототипини лойиҳалаштириши ва синовдан ўтказиши керак. Сўнгги ўн йил ичида муҳандислик факультети талабалари жамоалари орасида айниқса электромобиллар машҳур бўлди.

Tesla компаниясининг механик муҳандиси Жон Фуртадонинг сўзларига кўра, Tesla компаниясининг баъзи ходимлари мусобақада кўнгилли бўлиб қатнашган ва пойгаларда электрмобилларнинг кўплигидан ҳайратда қолган. Шу сабабли, Tesla пойга жараёнида иштирок этишга ва баъзи жамоаларга бевосита ҳомийлик қилишга қарор қилган.

«Teslaнинг дунёни барқарор энергияга ўтказиш жараёнини тезлаштириш бўйича миссияси доирасида биз университет талабалари жамоаларини бутун дунё бўйлаб Formula SAE ва Formula Student мусобақаларида электромобилларни яратишга интилишларини қўллаб-қувватлаймиз», — дейди Ғарбий Вашингтон университетининг собиқ талабаси.
Хабарга кўра, Tesla талабаларга жамоаларга қандай ҳомийлик қилиш бўйича бир нечта вариантни таклиф қилган. Улар 1000 тагача Tesla аккумуляторлари компонентлари ёки махсус прототип компонентларини ишлаб чиқаришга буюртма бериш учун Enepaq’дан 80 фоиз чегирма олишлари мумкин.

Бундан ташқари, Tesla ҳомийлик остидаги жамоаларга ўз лойиҳаларини дунёдаги етакчи электр қуввати муҳандислари билан кўриб чиқиш имкониятини беради ҳамда лойиҳалаш ва тасдиқлаш жараёнида талабаларни керакли маслаҳат, кўрсатмалар билан таъминлайди.

Аввалроқ Tesla носозликлар туфайли қарийб 500 мингта электромобилини «чақириб олиши» хабар қилинганди.