Трампнинг медиакомпанияси 1 млрд доллар сармоя жалб қилди
Инвесторларнинг исмлари ошкор этилмаган
АҚШнинг собиқ Президенти Дональд Трампга тегишли ижтимоий тармоқни ривожлантираётган Trump Media & Technology Group (TMTG) институционал инвесторлар гуруҳидан 1,25 миллиард доллар олиш бўйича келишувларни эълон қилди. Бу ҳақда Forbes хабар берди. Хабарда сармоя киритишда қандай инвесторлар иштирок этгани айтилмаган.
АҚШнинг собиқ Президенти Trump Media & Technology Group’ни, аллақачон, оммабоп бўлиб улгурган Digital World Acquisition Corp билан бирлаштириш ҳисобига биржага олиб чиқмоқчи. Компания инвестицияларни бизнесни бирлаштиргандан сўнг олади, пул бирлашган корхона фаолиятини таъминлаш учун ишлатилади.
«1 миллиард долларлик [инвестиция] бигтехга (йирик технологик компаниялар — таҳр.) цензура ва сиёсий дискриминацияга барҳам бериш кераклиги ҳақида муҳим сигнал юборади. Бизнинг балансимиз кенгайиб бораётгани сари TMTG бигтех зулмига қарши туриш учун кучлироқ позицияни эгаллайди», — дейди Трамп.
Маълумот учун, Дональд Трампнинг аккаунтлари энг йирик Ғарб платформалари томонидан блокланганидан кейин собиқ Президент Truth Social деб, номланган ўзининг ижтимоий тармоғини яратишни бошлади. Twitter Трампнинг саҳифасини бутунлай ўчириб қўйган бўлса, Facebook ва Instagram унинг саҳифаларини номаълум муддатга музлатиб қўйди.
2021 йилда Трамп 25 йил ичида биринчи марта Forbes журналининг АҚШнинг энг бой миллиардерлари рўйхатига кира олмади. АҚШнинг Forbes журнали рўйхатни тузаётганда Трампнинг бойлигини 2,5 миллиард долларга баҳолаган ва бу кириш чегарасидан ўтиш учун етарли эмас эди.
Аввалроқ америкалик миллиардер Илон Маск ўзининг сўнгги уйини 30 миллион долларга сотгани ва шу тариқа расман уйсиз қолгани хабар қилинганди.
