Туркияда истеъмол нархлари март ойида 2021 йилнинг шу ойига нисбатан 61,14 фоизга ўсди — бу 2002 йилнинг мартидан бери энг юқори кўрсаткичдир. Бу ҳақда мамлакат статистика институти (Turkstat) хабар берди.

Маълум қилинишича, инфляция даражаси февраль ойидаги 54,44 фоиз ва 2021 йил март ойидаги 16,19 фоизга нисбатан тезлашди. Trading Economics маълумотларига кўра, экспертлар март ойида инфляцияни ўртача 61,6 фоизда башорат қилган.

Туркияда инфляция кетма-кет ўнинчи ой ошди. Бунга Россия-Украина можароси натижасида лиранинг заифлашиши ва хом ашё нархининг кўтарилиши сабаб бўлди.

Март ойидаги энг сезиларли ўсиш транспорт хизматларида кузатилиб, йиллик кўрсаткичда 99,12 фоизни ташкил қилди. Шунингдек, озиқ-овқат ва алкоголсиз ичимликлар нархи 70,33 фоизга, мебель ва уй-рўзғор буюмлари нархи — 69,29 фоизга, ресторан ва меҳмонхоналардаги нархлар 60,4 фоизга ошди.

Туркияда истеъмол нархлари февраль ойидаги 4,81 фоизга нисбатан март ойида 5,46 фоизга ошди. Таҳлилчиларнинг консенсус прогнози 5,77 фоизга ўсишни тахмин қилганди.

Аввалроқ Туркия инфляция билан курашиш учун асосий озиқ-овқат маҳсулотларига ҚҚСни пасайтиргани хабар қилинганди. Шунингдек, Буюк Британияда инфляция рекорд даражада тезлашгани ҳақида хабар берилди.