Twitter ижтимоий тармоғига ҳамкорликда твит ёзиш функцияси қўшилади. Бу ҳақда TechCrunch хабар берди.

Маълум қилинишича, Twitter компанияси ҳамкорликда твит ёзиш имконини берувчи янги функцияни ишлаб чиқаётганини тасдиқлаган. Бундай имконият Instagram’да аллақачон мавжуд.

Янги восита «Ҳамкорлик» (Collaborations) деб номланади. Ундан фойдаланиш учун бир фойдаланувчи бошқасига қўшма пост сўровини юбориши керак бўлади. У сўровни қабул қилгандан сўнг, пост иккаласининг ҳисобларида пайдо бўлади. «Ҳамкорлик» блогерларга рекламаларни брендлашда ёрдам беради ва реклама берувчининг аккаунтига ҳавола беради.

Таҳлилчи Алессандро Палуззи декабрь ойида компания ушбу хусусият устида ишлаётганини ёзган эди. Унинг таъкидлашича, никнеймлар ва фойдаланувчи номлари твит тепасида кўринади, аватарлар эса бир-бирининг устига «тахланади».

Палуззининг сўзларига кўра, у кодда бундай постларни фақат Super Follows пулли обунасига обуна бўлган фойдаланувчиларга рухсат берувчи ҳеч қандай чекловларни топмаган.

Super Follows обунаси 2021 йили бутун дунё бўйлаб iOS ва Android фойдаланувчилари учун мавжуд бўлган. Пулли обуна камида 10 минг обуначига эга ҳисобларни улаши мумкин ва опциянинг ўзи фақат пулли обуначилар учун пост ёзиш имконини беради.

Аввалроқ Twitter яна 3 та давлатда ёлғон маълумотлар ҳақида хабар бериш функциясини ёқиши хабар қилинганди. Шунингдек, Twitter TikTok’ка ўхшаш вертикал видео функциясини синовдан ўтказа бошлагани ҳақида хабар берилди.