Лукашенко Украинанинг Беларусь калийли ўғитларидан воз кечганини маълум қилди. Бу ҳақда Беларусь Президенти матбуот хизмати хабар берди.

Маълум қилинишича, Беларусь Президенти Александр Лукашенко Украинанинг Беларусь калийли ўғитларидан воз кечганини ва АҚШдан уларни алмаштиришни сўраганини айтган.

«Президент Украина энди Беларусь калийли ўғитларидан воз кечишга қарор қилганини таъкидлади ва Америкадан ушбу маҳсулотни алмаштиришда ёрдам беришни сўради. Аммо Қўшма Штатлар буни рад этди, чунки улар асосан Канададан калий сотиб олади», дейилади Беларусь Президентининг веб-сайтида.

Лукашенконинг сўзларига кўра, Украина расмийларининг Беларусга қарши қилаётган ишлари ақлга сиғмайди.

«Уни сотиб олиш учун Америкага боришингиз керак! Нархи қанча эканлигини тасаввур қилинг: қазиб олиш, қайта ишлаш, темир йўл орқали олиб бориш, портларда юклаш, минглаб километрлар бу ерга, бу ерда яна юклаш, яна темир йўл транспорти, яна деҳқонларга олиб келгунча… Бир неча баравар қимматроқ бўлади. Нега шундай оғир вазиятда буларни қиляпсиз?» — деган Лукашенко.

Украина ахборот агентлиги маълумотларига кўра, 2021 йили 2020 йилга нисбатан Украинага минерал ўғитлар импорти 97,6 фоизга ошиб, 1,661 миллиард долларни ташкил этган. Хусусан, Украина Беларусдан 2021 йил декабрь ойида 4,385 миллион доллар, 2020 йил декабрда эса 1,703 миллион долларга калийли ўғит импорт қилган.

Аввалроқ Украина сўнгги ойларда Ғарбдан қанча маблағ олгани хабар қилинганди. Шунингдек, Қозоғистон Россия орқали Украинага кўмир етказиб беришда айрим чекловлар борлигини тан олгани ҳақида хабар берилди.