Дунёдаги етакчи озиқ-овқат ва уй-рўзғор буюмлари ишлаб чиқарувчиларидан бири бўлган Unilever Plc ekaterra чой бизнесини, жумладан Lipton брендини CVC Capital фондига 4,5 миллиард еврога сотишини эълон қилди. Бу ҳақда «Интерфакс» хабар бермоқда.

Маълум қилинишича, ekaterra ўз портфелида 34 та чой брендига эга бўлиб, 2020 йилда даромади 2 миллиард еврони ташкил қилади. Нашр хабарига кўра, келишув Unilever’нинг энг тез ўсиб бораётган маҳсулот тоифаларига эътибор қаратиш стратегиясига мос келади.

Unilever сўнгги йилларда истеъмолчилар хоҳиш-истакларининг ўзгариши фонида ёмонлашган чой бизнесидаги ўсиш даражасига қайта олмади. 2020 йил январь ойида компания уни сотишни кўриб чиқаётганини эълон қилди.

Бизнес портфелининг асосий қисмини қора чой брендлари ташкил қилади. АҚШ, Европа ва бошқа ривожланган мамлакатларда маҳсулотни истеъмол қилиш бошқа турдаги чой, қаҳва ва шишали сувлар фойдасига камаймоқда.

Unilever ўз портфелини Pukka ўсимлик чойлари билан кенгайтирди ва Starbucks’дан Tazo брендини сотиб олди. Бундан ташқари, портфелда ғайриоддий таъмга эга хушбўй чойлар ишлаб чиқарадиган Австралиянинг T2 чой бренди мавжуд. Ҳаммаси бўлиб ekaterra бутун дунё бўйлаб 11 та ишлаб чиқариш заводи ва 3 та мамлакатда чой плантацияларига эга.