Ўзбекистонлик 5 нафар ёш қиз «AI Journey 2021» халқаро конференциясида иштирок этди ва унинг доирасида Россия Президенти Владимир Путинга ўз лойиҳасини тақдим этиш имкониятига эга бўлди. Бу ҳақда IT Park матбуот хизмати хабар берди.

Маълум қилинишича, «IT Queens» — Ўзбекистон жамоаси бўлиб, унинг аъзолари Юлиана Луценко, Анастасия Королева, Ксения ва Анастасия Бадян ҳамда Лана Насрулинадан иборат. Биринчи босқичда қизлар сунъий интеллект соҳасида лойиҳа ишлаб чиқишган, унинг мақсади «Deepfake» материалларини таниб олиш ҳисобланади.

Таъкидланишича, лойиҳа жамоа томонидан икки ҳафта ичида ишлаб чиқилган.  Лойиҳа Ўзбекистонда «AI Journey 2021» халқаро конференцияси доирасида Россия Президенти олдида  тақдим этилган. 500 дан ортиқ иштирокчилар орасида «IT Queens» жамоаси ғолиб бўлган ва халқаро майдонга чиқиш, шунингдек, шахсан гапириб, муаммога замонавий ечимини тақдим этиш имкониятига эга бўлган. Қизлар «Data Lady» махсус номинацияси ғолиби бўлган.

«Ушбу ишланмалардан одамлар манфаати учун фойдаланиш, шунингдек, қизиқарли, чиройли ва оммабоп маҳсулотлар яратиш мумкин.  Энг муҳими эса, сунъий интеллект ва замонавий технологиялар ёрдамида инсонлар ҳуқуқлари бузилганда уларнинг манфаатларини ҳимоя қилиш йўлларини топиш мумкин.  Бу шундан далолат берадики, агар тўғри, ижобий йўналишда фикр юритилса, технологик тараққиёт билан боғлиқ бўлган барча таҳдидларга қарамай,  доимо тўғри ечимни топиш мумкин.  Ҳар доим, ҳар қачон шундай бўлган ва Худога шукур, бу сиз каби қизлар шарофати билан бугун содир бўлмоқда», — деган Владимир Путин.

Қайд этилишича, Deepfake — бу ҳақиқий фотосуратлар ёки видеолар асосида сунъий интеллект орқали яратилган синтезланган тасвир.  Унинг ёрдами билан одамга, унинг обрўсига путур етказадиган, кейинчалик уларни шантаж қиладиган ва манипуляция қиладиган контентни яратиш мумкин.

Аввалроқ IT Park соврин жамғармаси 55 минг доллар бўлган танлов эълон қилгани ҳақида хабар берилганди. Шунингдек, Туркий тилли давлатлар кинофестивалида Ўзбекистон 3 та мукофотни қўлга киритгани хабар қилинди.