Япония, Австралия ва Янги Зеландия Россияга қарши янги санкциялар киритди
Санкциялар Россия миллиардерлари, мудофаа ва молия соҳаларига қаратилган.
Япония, Австралия ва Янги Зеландия Украинага қарши бошланган уруш туфайли Россияга қарши янги санкциялар жорий қилди.
Япония
Япония 15 нафар россиялик жисмоний шахс ва тўққизта ташкилотга, шу жумладан мудофаа сектори расмийлари ва давлат қурол экспортчиси «Рособоронэкспорт»га қарши санкциялар киритмоқда. Бу ҳақда Reuters ёзмоқда.
Қайд этилишича, активларни музлатишни назарда тутувчи санкцияларга Россия ташқи ишлар вазирлигининг расмий вакили Мария Захарова, миллиардер Сулаймон Керимов, Россия мудофаа вазирининг саккиз нафар ўринбосари дучор бўлди. Компаниялар орасида «Рособоронэкспорт», «Россия вертолётлари», Бирлашган авиация корпорацияси, «Уралвагонзавод» ва бошқаларга нисбатан санкциялар жорий етилди.
Умуман олганда, Россия Украинага бостириб киргандан сўнг, Япония Россиядаги 76 киши, еттита банк ва 12 та бошқа ташкилотга қарши санкциялар киритди.
Янги Зеландия
Мамлакат ташқи ишлар вазирлигига кўра, Янги Зеландия 13 нафар россияликка қарши санкциялар киритди. Улар орасида Президент Владимир Путин ва Россия Хавфсизлик кенгашининг 12 нафар аъзоси, битта банк ва 18 та бошқа ташкилот мавжуд.
Санкциялар ушбу шахслар ва ташкилотлар билан ҳамкорликни тақиқлаш, активларни музлатиш ҳамда кемалар ва самолётларнинг мамлакатга киришини тақиқлашни кўзда тутади. Бундан ташқари, Янги Зеландия яна 364 нафар сиёсатчи ва ҳарбийнинг мамлакатга киришини тақиқлади.
Австралия
Австралия, ўз навбатида, Россиянинг суверен қарзига хизмат кўрсатувчи яна 11 та Россия банки ва давлат муассасаларига нисбатан санкциялар жорий қилмоқда. Бу ҳақда мамлакат ташқи ишлар вазирлиги матбуот хизмати хабар берди.
Улар биргаликда Россиянинг барча банк активларининг тахминан 80 фоизини ташкил этади ва «Сбербанк», «Газпромбанк», «ВЭБ», «ВТБ», «Россельхозбанк», «Совcомбанк», «Новикомбанк», «Альфа-Банк» ва «Москва кредит банки»ни ўз ичига олади.
Австралия Владимир Путинга яқин миллиардерларга қарши санкция босимини ҳам оширди.
«Биз аллақачон мақсадли молиявий санкциялар ва саёҳат тақиқларини қўйган 41 нафар олигарх ва уларнинг яқин оила аъзоларидан ташқари, Австралия энди мамлакатдаги бизнес манфаатларига алоқадор икки нафар миллиардер — Олег Дерипаска ва Виктор Вексельбергни ҳам қўшди», дейилади ҳисоботда.
Бундан ташқари, Европа Иттифоқи Кенгаши Россияга қарши санкцияларнинг тўртинчи пакетини эълон қилганди. Унга 15 нафар шахс, жумладан, Россия «Первий канал»ининг бош директори Константин Эрнст ва россиялик миллиардер Роман Абрамович киритилди.
