Японияда ниқобли харидорларнинг юзини танийдиган тўлов тизими синовдан ўтказилмоқда. Бу ҳақда Nikkei Asia хабар берди.

Япониянинг Glory технологик компанияси мижозларнинг юзларини ҳатто ниқоб кийганда ҳам таний оладиган контактсиз тўлов тизимини синовдан ўтказмоқда. BioPay Ниигата шаҳридаги 10 та дўкон ва ресторанларда ўрнатилган.

Фойдаланувчи ўз юзининг суратини юклайди ва Glory веб-сайтига банк картасини бириктиради. Шундан сўнг, BioPay тизимига уланган экран қаршисида туриб, 1–2 сония ичида дўкон ва ресторанларда харидларни амалга ошириши мумкин.

Бу Японияда шундай тизимнинг биринчи синови бўлиб, у бир неча жойларда ўтказилмоқда ва ҳамма учун очиқ. Синов дастури февраль ойигача давом этади. Glory технология тизимларини синовдан ўтказиш учун Ниигата ҳукумати томонидан тақдим этилган субсидиядан фойдаланган.

Маълумот ўрнида, Glory 1918 йилда ташкил этилган бўлиб, компания дастлаб лампочка ишлаб чиқариш учун ускуналарни таъмирлашга ихтисослашган. Glory банкоматлари ва тўлов хизматлари 100 дан ортиқ мамлакатлардаги банк ва дўконларда мавжуд.

Ниигата ва Glory ташриф буюрувчиларнинг бинога кириш ва чиқишини назорат қилиш тизими билан жиҳозланган ходимларсиз дўконлар очишни режалаштирмоқда.

Аввалроқ Японияда гаджетларни ҳаво орқали қувватлантириш мумкин бўлиши хабар қилинганди.