Ўзбекистоннинг Япониядаги элчихонасида «Фукусима-Ўзбекистон» маданий иқтисодий алоқалар жамиятининг Токиодаги офиси раҳбари Накада Юкими ҳамда Three Lamps Inc. корхонаси президенти Масахито Саммё билан музокаралар бўлиб ўтди. Бу ҳақда «Дунё» ахборот агентлиги хабар берди.

Таъкидланишича, «Фукусима-Ўзбекистон» жамияти 1993 йилда япон жамоат арбоби Тосио Сисидо томонидан ташкил қилин  ган бўлиб, унинг фаолияти икки давлат ўртасидаги маданий ва академик алмашинувлар ҳамда Ўзбекистонда қишлоқ хўжалиги, жумладан ипакчилик саноатини ривожлантиришга қаратилган.

Қайд этилишича, учрашувда жамият томонидан амалга оширилаётган маданий-гуманитар, таълим ва иқтисодий соҳалардаги чора-тадбирлар ҳамда унинг келгусидаги режалари ҳақида фикр алмашилган.

Жумладан, Юкуми Накада жамият ташаббуси билан JICA томонидан Japan Silk and Silk Thread Development уюшмасига Ўзбекистоннинг Фарғона вилоятида ипакчилик саноатини тадқиқ қилишга мўлжалланган грант ажратилганлиги ҳамда ушбу лойиҳани амалга ошириш бўйича «Ўзбекипаксаноат» уюшмаси билан меморандум имзоланганини маълум қилди.

Ушбу лойиҳа 2022 йилнинг мартидан 1 йил давомида амалга оширилади ва унинг доирасида Япониядан сифатли ипак ишлаб чиқаришга мўлжалланган махсус ускуна олиб келиниб, япон мутахассислари томонидан тадқиқотлар амалга оширилади.

Шунингдек, Ўзбекистон ипакчилик соҳасида бой тажриба ва юксак салоҳиятга эга мамлакат экани таъкидланиб, ушбу соҳада амалга оширилаётган кенг кўламли ислоҳотлар ва унинг истиқболлари тўғрисида батафсил маълумот берилган.

Учрашув якунида жамият билан ҳамкорликда Японияда ипакчилик ва бошқа соҳаларда фаолият юритаётган корхоналарнинг Ўзбекистонга таништирув ташрифларини амалга оширишга келишиб олинган.

Аввалроқ Халқаро тикланиш ва тараққиёт банки Ўзбекистон қишлоқ хўжалигига 19,5 миллион евро ажратиши хабар қилинганди. Шунингдек, Ўзбекистонда қишлоқ хўжалигини қўллаб-қувватлаш учун 100 млн доллар ажратилиши ҳақида хабар берилди.