Алишер Усмоновдан Михаил Фридмангача: ЕИ Россиянинг энг бой миллиардерларига қарши санкция жорий қилиши мумкин
Иттифоқ Путиннинг матбуот котибига ҳам санкция қўллаш имкониятини кўриб чиқмоқда
Европа Иттифоқи Москванинг Украинага бостириб киришига қарши санкцияларни янада кучайтириш мақсадида Россиянинг баъзи бой инсонлари, шунингдек, юқори мартабали давлат компаниялари ва оммавий ахборот воситалари ходимларига нисбатан санкциялар қўллашни муҳокама қилмоқда. Бу ҳақда мавжуд ҳужжатларга таяниб, Bloomberg хабар берди.
Маълум қилинишича, Европа ҳукуматлари томонидан тасдиқланмаган рўйхатга ҳали АҚШ санкциялари таъсирига тушмаган бир неча миллиардерлар киради. Булар пўлат магнати Алишер Усмонов (молиявий ҳолати — 20 миллиарддан ортиқ), Alfa Group эгалари Михаил Фридман (молиявий ҳолати — 11 миллиард доллар) ва Пётр Авен, шунингдек, йирик пўлат компаниясини бошқарадиган Алексей Мордашов.
Шунингдек, санкциялар Президент Владимир Путиннинг узоқ йиллик матбуот котиби Дмитрий Песковга, Европа Иттифоқи ҳужжатларида дезинформация тарқатишда айбланган бир қатор давлат ОАВ вакилларига ҳам жорий этилиши мумкин. Маълумотларга қараганда, таклиф этилаётган рўйхатга виолончель чалувчи ва Путиннинг азалий дўсти Сергей Ролдугин киритилган.
Европа Иттифоқи етакчи давлат компаниялари раҳбарларини, шунингдек, сўнгги йилларда кўпчилиги АҚШ санкцияларига учраган ҳарбий ва хавфсизлик ходимларини қидирмоқда. Таклиф этилаётган рўйхатга «Роснефт» бош ижрочи директори Игор Сечин ва «Транснефт» бош директори Николай Токарев кирган.
Европа Иттифоқи бош дипломати Жосеп Боррель 27 февраль, якшанба куни журналистларга Иттифоқ элчиларининг йиғилишида «Чеклов чоралари қўлланилган жисмоний ва юридик шахслар сонини кўпайтиришга келишиб олдик, тўлиқ рўйхат якунланади», — дея маълум қилган.
«Бу рўйхати катта иқтисодий аҳамиятга эга бўлган россиялик олигархлар ва бизнесменлар, шунингдек, Россиядаги Путин тизимида асосий роль ўйнайдиган сиёсатчиларни ўз ичига олади», — дея қўшимча қилинган хабарда.
Оқ уй вакили ҳам россиялик миллиардерларга санкция қўлланишига тўхталиб ўтди.
«АҚШ ҳали ҳеч қандай чора кўрмаган бўлса-да, Байден маъмурияти ҳеч бир россиялик олигарх ёки унинг оила аъзоси санкциялардан ҳимояланмаганини аниқ айтди», — дейди Оқ уй вакили.
Аввалроқ Россиянинг Украинага ҳарбий операциясининг биринчи кунида россиялик тадбиркорларнинг бойлиги 39 миллиард долларга камайгани, хусусан, USM асосчиси ва асосий акциядори Алишер Усмонов рўйхатда россиялик миллиардерлар орасида бешинчи ўринни қайд этиб, 1,2 миллиард доллар йўқотгани маълум қилинганди.
