Алишер Усмоновнинг Германиядаги учта вилласи мусодара қилиниши мумкин
Маҳаллий сиёсатчи, «Яшиллар» партияси ва Роттах-Эгерн шаҳар кенгаши аъзоси Томас Томашек расмийлардан ушбу қасрларни тортиб олишни талаб қилмоқда.
Германияда россиялик миллиардер Алишер Усмоновнинг активларини музлатиш ёки мусодара қилишга чақириқлар янграмоқда, деб ёзади The New York Times.
Нашрнинг ёзишича, тадбиркор Тегернзе кўли бўйида жойлашган Бавариянинг Роттах-Эгерн коммунасида учта виллага эга. Маҳаллий сиёсатчи, «Яшиллар» партияси ва Роттах-Эгерн шаҳар кенгаши аъзоси Томас Томашек расмийлардан ушбу қасрларни тортиб олишни талаб қилмоқда.
Март ойининг охирида у виллалар яқинида 300 га яқин одам тўпланган норозилик намойишини уюштирди, бу Бавария туманининг кўплаб аҳолисини ҳайратда қолдирди.
«Бизда олигархлар билан маънавий муаммо бор. Кўпчилик менга: ‘Шовқин қилманг, бу бизнинг ишимиз эмас’, дейди. Менимча, бу бизнинг ишимиз», — деди Томашек нашрга берган интервьюсида.
Маҳаллий ҳокимият ва тадбиркорлар унинг ташаббусига қарши. Роттах-Эгерн мэри Кристиан Кек фаолни «жодугар ови»да айблаб, акция ўтказишдан қайтармоқчи бўлди. Томашекнинг ғоясини шаҳар кенгашининг бошқа аъзолари ҳам қўллаб-қувватламади, улардан бири Усмоновнинг архитектори бўлиб ишлаган.
Усмоновнинг матбуот хизмати Роттах-Эгерндаги мулк бир неча йил аввал «бутунлай шаффоф ва қонуний тартибда» оилавий трастга ўтказилгани, тадбиркорнинг «Украинадаги вазиятга ҳеч қандай алоқаси йўқлиги ва Владимир Путинга яқин эмаслиги»ни таъкидлади.
Усмоновнинг йўлидаги санкциялар
Маълумот учун, Усмонов 28 февраль куни — миллиардерлар Алексей Мордашов, Геннадий Тимченко, Михаил Фридман, Петр Авен ва Александр Пономаренко билан бир вақтда Европа Иттифоқи санкцияларига учраган.
ЕИ санкцияларни Россиянинг Украинага ҳужуми бошланганидан тўрт кун ўтиб жорий қилди. Ҳозирда Европа Иттифоқи олтинчи чекловлар пакетини тайёрламоқда.
«Европа Иттифоқи ўз доирасида «Сбербанк» ва яна иккита Россия банкини SWIFT молиявий маълумотлар алмашинуви тизимидан ажратишни, шунингдек, Россия нефтининг импортига босқичма-босқич эмбаргога ўтишни таклиф қилади», — деди Еврокомиссия раҳбари Урсула фон дер Ляйен.
Россиялик миллиардерлар, давлат ва хусусий компаниялар раҳбарлари, депутатлар, сенаторлар, ҳарбийлар ва давлат оммавий ахборот воситалари ходимлари Европа Иттифоқи, Буюк Британия, АҚШ ва бир қатор бошқа мамлакатларнинг санкциялари остида қолди. Санкциялар Украинадаги ҳарбий амалиётга жавобан жорий қилинган.
Хусусан, Канада ҳам Россиянинг Украинага ҳужуми туфайли миллиардер Алишер Усмонов Алишер Усмоновга қарши санкциялар киритган.
Шунингдек, Япония Ташқи ишлар вазирлиги Россия ва Беларуснинг санкциялар қўлланилаётган юридик ва жисмоний шахслари рўйхати кенгайтирилганини маълум қилди. Улар орасида Алишер Усмонов ҳам бор.
Қолаверса, Германия ҳукумати Гамбургдаги кемасозлик заводида Алишер Усмоновнинг 600 миллион долларлик «Дилбар» мега яхтасини тўсиб қўйди.
Англиянинг «Эвертон» футбол клуби Россиянинг Алишер Усмоновга алоқадор USM, «МегаФон» ва Yota компаниялари билан ҳомийлик шартномаларини тўхтатди.
Кейинчалик миллиардер ўзига нисбатан қўлланилган Европа Иттифоқи санкцияларини олиб ташлаш учун судга мурожаат қилди.