Билл Гейтс Россия-Украина уруши ва пандемия дунё иқтисодий таназзулига сабаб бўлишини айтди
Миллиардернинг фикри дунё етакчилари билдирган мулоҳазалар билан тўғри келмоқда.
Microsoft асосчиси ва миллиардер Билл Гейтснинг фикрича, Россиянинг Украинага ҳужуми ва пандемиянинг оқибатлари дунё яқин келажакда иқтисодий таназзулга юз тутиши бўйича «кучли далил» яратади.
«Бу давлат қарзи даражаси жуда юқори бўлган ва етказиб бериш занжирлари билан боғлиқ муаммолар келтириб чиқарган бўлган пандемия билан боғлиқ. Бу, эҳтимол, дунёнинг бадавлат иқтисодиётлари олдида турган инфляция муаммоларини кучайтиради ва фоиз ставкаларининг ошишига олиб келади, оқибатда иқтисодий ўсишни секинлаштиради», — деди Билл Гейтс CNN телеканалига.
Гейтснинг қўшимча қилишича, мамлакатларнинг фоиз ставкаларини ошириш орқали ўсиб бораётган инфляцияни жиловлаш борасидаги саъй-ҳаракатлари якунда иқтисодий ўсишнинг секинлашишига олиб келадиган яна бир ҳисса омилидир.
Миллиардернинг фикри дунё етакчилари билдирган мулоҳазалар билан тўғри келмоқда. Апрель ойида АҚШ молия вазири Жанет Еллен Россиянинг Украинага ҳужуми бутун дунё учун улкан иқтисодий оқибатларга олиб келишини айтган эди.
Буюк Британия, Ҳиндистон ва АҚШ каби кўплаб мамлакатлардаги тартибга солувчилар қисман пандемия таъсиридан келиб чиққан ҳолда рекорд даражадаги инфляцияга қарши курашиш учун фоиз ставкаларини оширди. АҚШда Федерал резерв ставкаларни ярим фоиз пунктга оширди, бу сўнгги 20 йилдаги энг катта ўсишдир.
Аввалроқ Россия Марказий банки асосий ставкани йиллик 9,5 фоиздан бирданига 20 фоизга кўтарганди. Бу Россия тарихидаги мутлақ рекорд кўрсаткичдир.
Шунингдек, 17 март куни ўтказилган Ўзбекистон Марказий банки бошқарувининг йиғилишида асосий ставкани 3 фоиз бандга ошириб, йиллик 17 фоиз даражасида белгилаш тўғрисида қарор қабул қилинди.