Америкалик миллиардер Тодд Боэли (Forbes Real-Time маълумотларига кўра, бойлиги 4,5 миллиард доллар) бошчилигидаги инвесторлар гуруҳи россиялик миллиардер Роман Абрамовичга тегишли бўлган Англиянинг «Челси» футбол клубини сотиб олиш бўйича келишувга эришди.

Харидорлар клубдаги улушлар учун 2,5 миллиард фунт стерлинг (3,1 миллиард доллар) тўлайди. Бу пул кейинчалик хайрияга ўтказиш учун музлатилган ҳисоб рақамига ўтказилади.

Яна 1,75 миллиард фунт стерлинг (2,17 миллиард доллар) билан янги хўжайинлар клуб ривожига сармоя киритади. Келишувдан сўнг битим май ойи охиригача ёпилиши кутилмоқда. Клубнинг сотилишини Буюк Британия ҳукумати, Англия Премьер-лигаси эса янги хўжайин ва жамоа раҳбариятини маъқуллаши керак.

Bloomberg маълумотларига кўра, «Челси»ни сотиб олувчи инвесторлар консорциумига Боэлидан ташқари Clearlake Capital инвестиция компанияси ва икки миллиардер — швейцариялик Хансйорг Висс (бойлиги 5,1 миллиард доллар) ва америкалик Марк Уолтер (4 миллиард доллар) киради.

Боэли ва Уолтер «Лос-Анджелес Дожерс» бейсбол жамоасининг ҳам эгалари ҳисобланади.

Bloomberg’нинг Sky News’га таяниб қайд этишича, Боэли консорциуми ва «Челси» адвокатлари клубда инвесторларни мукофотлаш учун эмас, балки футболга сарфлаш учун етарли маблағ борлигига ишонч ҳосил қилиш учун келишув бандларини сўнгги дақиқаларгача муҳокама қилган.

Телеканал хабарига кўра, келишув шартларида 2032 йилгача клуб бошқаруви учун дивидендлар ёки маблағлар тўлаш истисно қилинган.

Аввалроқ Буюк Британиянинг энг бой одамларидан бири Жим Рэтклифф Роман Абрамовичдан 5,3 миллиард долларга «Челси» футбол клубини сотиб олишни таклиф қилганди. Агар келишув амалга ошганида, бу спорт жамоасининг тарихдаги энг қиммат хариди бўлар эди.

Эслатиб ўтамиз, Абрамович Буюк Британия унга нисбатан санкциялар киритгач, «Челси»ни сотувга қўйишга мажбур бўлди. Миллиардер клубга қарийб 20 йил эгалик қилган.

Абрамович хайрия жамғармаси ташкил этишга ва жамоани сотишдан тушган соф даромадни унга йўналтиришга ваъда берди. Ҳозирда клубни жамоанинг хайрия жамғармаси васийлари бошқаради.