Хитойнинг Evergrande компанияси асосчиси ва бош директори, миллиардер Хуэй Ка Янь активлар сотувидан тушган ўз маблағидан тахминан 7 миллиард юань (1 млрд доллар)ни компания қарзларини тўлаш учун сарфлади. Бу ҳақда China Business News ўз манбаларига таяниб хабар бермоқда.

Нашр манбаларининг қайд этишича, миллиардер 1 июлдан бошлаб ўзининг шахсий активларини сотиш ёки гаровга қўйиб, Evergrande’нинг ликвидлигини сақлаб қолиш учун зарур маблағларни йиға бошлаган. Reuters манбасининг аниқлик киритишича, миллиардер ўз коллекциясидаги санъат ва хаттотлик асарларини сотган. Шунингдек, ликвидликни бўшатиш учун 3 та ҳашаматли кўчмас мулкни гаровга қўйган.

Бундан ташқари, Evergrande катта йўқотишлар билан корпоратив активларини фаол равишда сотмоқда. Гап бошқалар қаторида HengTen Network Group стриминг компаниясининг улушини 2,13 миллиард Гонконг долларига (241 миллион евро) сотиш ҳақида бормоқда.

Унинг 18 фоиз улушини сотиш натижасида ишлаб чиқувчи, ўз маълумотларига кўра, 8,5 миллиард Гонконг доллари (963 миллион евро) зарар кўради. Бундан ташқари, Business Insider бир ой олдин Evergrande компанияга иккита шахсий самолётни 50 миллион долларга сотганини эслатди.

Evergrande Хитойнинг энг йирик ва энг кўп қарздорликка эга кўчмас мулк ишлаб чиқарувчиларидан бири ҳисобланади. Июнь ойи ҳолатига кўра, Evergrande’нинг қарз мажбуриятлари 300 миллиард доллардан ошди. Сентябрь ойида компания доллардаги облигациялари эгаларига ўз вақтида тўламай, дефолт ёқасида қолди.

Шундан сўнг Хитой расмийлари компания таъсисчисидан қарзларни ўз чўнтагидан тўлашни талаб қилган. Forbes Real-Time маълумотларига кўра, Хуэй Ка Яннинг бойлиги 11,5 миллиард долларни ташкил қилади.

Аввалроқ Жек Ма энг бой хитойлик бизнесменлар рейтингида бешинчи ўринга тушиб кетгани маълум бўлганди.