Европа Иттифоқи Россиянинг еттита банкини SWIFT тизимидан узиб қўйди
ЕИ евро банкнотларини Россияга, Россиядаги ҳар қандай жисмоний ва юридик шахсга етказиб бериш ва ўтказишни ҳам тақиқлади.
Европа Иттифоқи Россиянинг Украинадаги «ҳарбий амалиёти»га жавобан Россия банкларини SWIFT’дан узди. Бу ҳақда Европа Иттифоқининг расмий журнали хабар берди.
Европа Иттифоқи (ЕИ) «ВТБ», «Россия» ва «Откритие» банклари, «Новикомбанк», «Промсвязьбанк», «Совкомбанк» ва «ВЭБ.РФ»ни SWIFT тизимидан узишга қарор қилди. Қарор ушбу банкларнинг 50 фоиздан ортиғига бевосита ёки билвосита тегишли бўлган ташкилотларга тегишли.
«Қарор вазиятнинг оғирлигини ҳисобга олган ҳолда ва Россиянинг Украинага қарши ҳарбий тажовузкорлигига жавобан қабул қилинди», дейилади ЕИ ҳужжатида.
ЕИ, шунингдек, евро банкнотларини Россияга, Россиядаги ҳар қандай жисмоний ёки юридик шахсга, шу жумладан Марказий банкка сотиш, етказиб бериш ва ўтказишни тақиқлади.
Маълумот ўрнида, SWIFT бутун дунё бўйлаб банклар ўртасида тўлов маълумотларини алмашиш учун ишлатилади.
«ВТБ»нинг маълум қилишича, тизимнинг ўчирилиши банкнинг Россиядаги мижозларга хизмат кўрсатишига таъсир қилмайди. Шунингдек, бу корпоратив мижозлар томонидан халқаро пул ўтказмаларини амалга ошириш билан боғлиқ мавжуд вазиятни ўзгартирмайди.
Аммо SWIFT’дан узилиш чет элдаги мижозларга таъсир қилади.
«Биз хориждаги барча мижозларни исталган банкоматдан нақд пул ечиб олиш зарурлиги ҳақида олдиндан хабардор қилдик. Санкциялар туфайли жисмоний шахслар учун хорижга пул ўтказмаларини амалга ошириш имкони йўқ», дейилади банк хабарида.
Аввалроқ Apple Россияда маҳсулот сотишни тўхтатгани хабар қилинганди. Шунингдек, Россиянинг санкцияга учраган банклари Visa ва Mastercard карталарини чиқаришни тўхтатиши ҳақида хабар берилди.