Илон Маск McDonald’s’ни Dogecoin криптовалютасини қабул қилишга чақирди
Ўтган 12 ойда Dogecoin қиймати қарийб 1600 фоизга ошган, 2022 йил бошидан эса 18 фоизга пасайган.
Илон Маск McDonald’s корпорациясини Dogecoin’ни қабул қилишни бошлашга чақирди. Бу ҳақда у ўзининг Twitter’даги саҳифасида маълум қилди.
«Агар McDonald’s Dogecoin’ни қабул қилса, мен телевизорда ‘Хэппи Мил’ ейман», — деб ёзади Маск.
Криптовалютанинг курси шундан кейин 8 фоизга кўтарилди, аммо кейин ўсишни пасайтирди. Тошкент вақти билан 20:10 ҳолатига кўра, Dogecoin курси 0,1381 долларни ташкил этади, бу аввалги сессиянинг якуний қийматидан 0,45 фоизга юқори.
Сиба-ину зотли ит тасвирланган интернет-мем шарафига 2013 йилда яратилган Dogecoin капиталлашув бўйича ўнта энг йирик криптовалюталардан биридир. Ўтган 12 ойда унинг қиймати қарийб 1600 фоизга ошган, 2022 йил бошидан эса 18 фоизга пасайган.
Аввалроқ Илон Маскнинг Tesla компанияси ўз маҳсулотларига Dogecoin мем-криптовалютаси билан тўлов қилиш имкониятини яратганди.