Илон Маск ўзининг сўнгги уйини 30 миллион долларга сотди. Ушбу уй Калифорния штатининг Ҳиллсборо шаҳрида жойлашган ва майдони 19 гектар эди. Харидорнинг исми ошкор этилмаган. Бу ҳақда Inc. нашри хабар берди.

Қайд этилишича, ўтган ёзда Маск сўнгги уйини 37,5 миллион долларга, кузда эса 31,99 миллион долларга сотмоқчи бўлган.

Mansion Global’нинг маълумотларига кўра, уйда 7 та ётоқхона, 10 та ҳаммом, ошхона, рақс зали, чарм деворли кутубхона, 11 та машинага мўлжалланган гараж ва бассейн мавжуд. Маск уйни 2017 йилда 23,4 миллион долларга сотиб олган эди.

Ушбу уй штатга кўчиб ўтган француз зодагонларининг аъзоси граф Кристиан де Гинье томонидан 1912 йилда қурилган.

Маълумот учун, Маск барча кўчмас мулкларини сотган. У ҳозирда Техас штатида SpaceX компаниясидан ижарага олинган 37 квадрат метр майдонни ташкил этувчи уйда истиқомат қилмоқда. Тадбиркор ушбу қарорини унга Ерда кўчмас мулк керак эмаслиги, чунки уни Марсдаги ҳаёт кўпроқ қизиқтираётгани билан изоҳлаган.

Аввалроқ Tesla бош директори Илон Маск компаниянинг 934 мингдан ортиқ акциясини 1,01 миллиард долларга сотгани хабар қилинганди.