Илон Маск Twitter’ни сотиб олиш бўйича келишувни вақтинча тўхтатди
Йилнинг биринчи чорагида ижтимоий тармоқдаги сохта ва спам-аккаунтларнинг улуши 5 фоиздан камроқни ташкил этган.
Twitter’ни миллиардер Илон Маскка сотиш бўйича келишув тўхтатилди. Бу ҳақда бизнесмен ижтимоий тармоқдаги саҳифасида маълум қилди.
Унинг сўзларига кўра, томонлар сохта аккаунтлар ва спам-саҳифалар Twitter фойдаланувчилари умумий сонининг 5 фоиздан камроғини ташкил этиши ҳақидаги маълумотларнинг тасдиқланишини кутмоқда.
Nasdaq биржаси маълумотларига кўра, Twitter акциялари Маскнинг эълонидан кейин олди-сотдида 20 фоиздан кўпроққа тушиб кетди. Тошкент вақти билан 11:15 га келиб, 12 майдаги савдолар 45,08 долларда якунланганига қарамай, қимматли қоғозлар тахминан 36 долларни ташкил қилди.
Twitter’нинг май ойи бошидаги ҳисоботида йилнинг биринчи чорагида сохта ва спам-аккаунтларнинг улуши 5 фоиздан камроқни ташкил этгани ҳақида айтилганди.
Ўша пайтда компанияда рекламалар кўрсатилган 229 миллион саҳифа мавжуд эди — компания буни «монетизация қилинадиган» ноёб фойдаланувчилар деб атайди.
Маск аввалроқ Twitter’нинг янги эгаси сифатидаги вазифаларидан бири ижтимоий тармоқдаги спам-ботларга қарши курашиш бўлишини айтган эди. Апрель ойида Twitter хато туфайли 2019 йилдан бери ўз аудиторияси сонини оширганини тан олди.
Аввалроқ Илон Маск Twitter’ни сотиб олишга камроқ шахсий пул сарфлаш йўлини қидираётгани ҳақида хабар берилганди. Шунингдек, миллиардер Twitter’ни айрим фойдаланувчилар учун пуллик қилишни таклиф этди.
Шунингдек, Microsoft асосчиси Билл Гейтс Tesla бош директори Илон Маск Twitter’ни сотиб олганидан кейин, айниқса, ижтимоий тармоқларда нотўғри маълумотлар тарқалишидан хавотир кучаяётган бир пайтда платформа қандай ўзгариши номаълумлигини айтди.
Шунингдек, Маск Twitter’ни сотиб олиш ишлари тугаганидан сўнг бир неча ой давомида компанияга вақтинчалик бош директор бўлиши мумкинлиги ҳақида хабар берилди.
Илон Маск инвесторлар учун Twitter’ни 2028 йилгача ривожлантириш бўйича тақдимот тайёрлади, унда Маск компаниянинг йиллик даромадини беш бараварга, яъни 26,4 миллиард долларгача оширишга ваъда берди.