Дунёнинг энг бой бизнесмени Илон Маск Twitter’ни сотиб олиш ишлари тугаганидан сўнг бир неча ой давомида компанияга вақтинчалик бош директор бўлиши мумкин, дея хабар беради CNBC манбалари. Телеканал Маскнинг изоҳини тақдим этмади.

Миллиардер ижтимоий тармоқни қўлга киритган тақдирда Twitter’нинг ҳозирги раҳбарияти билан боғлиқ тарзда амалга ошадиган режаларни ошкора эълон қилмади.

Reuters манбаси апрель ойи охирида бизнесмен бош директор лавозимига янги номзодни аллақачон топганини маълум қилди — бироқ манба у ким ҳақида гапираётганини айтмади.

«Twitter’нинг амалдаги бош директори Параг Агравал компанияни Маскга сотиш ишлари тугагунига қадар ўз лавозимида қолиши кутилмоқда», — дея таъкидлади Reuters.

Агравал Twitter бош директорлигига 2021 йилнинг ноябрь ойида келиб, платформа асосчиларидан бири, миллиардер Жек Дорсининг ўрнини эгаллаганди.

Таъкидланишича, Маск Twitter’ни сотиб олиш бўйича ўз таклифини қисман молиялаштириш бўйича банклар билан музокаралар олиб борар экан, компаниянинг молиявий самарадорлигини ошириш ҳақида гапирган ҳамда бош директор ва директорлар кенгаши аъзоларининг маошларини қисқартириш ҳақида ҳам сўз очган. Бироқ бу қатъий ниятлардан кўра кўпроқ тахминлар, холос.

Аввалроқ Илон Маск Twitter’ни сотиб олишга камроқ шахсий пул сарфлаш йўлини қидираётгани ҳақида хабар берилганди. Шунингдек, миллиардер Twitter’ни айрим фойдаланувчилар учун пуллик қилишни таклиф этди.

Шунингдек, Microsoft асосчиси Билл Гейтс Tesla бош директори Илон Маск Twitter’ни сотиб олганидан кейин, айниқса, ижтимоий тармоқларда нотўғри маълумотлар тарқалишидан хавотир кучаяётган бир пайтда платформа қандай ўзгариши номаълумлигини айтди.