Илон Маск ва қўшиқчи Граймс яна бир бор фарзандли бўлди
Маск ва Граймс қизнинг туғилганини атайлаб бир неча ой давомида яширган.
Миллиардер Илон Маск ва қўшиқчи Граймс иккинчи марта ота-она бўлди — 2021 йилнинг охирида уларнинг Экза Дарк Сайдириэль (Exa Dark Sideræl) исмли қизи туғилган. Бу ҳақда Граймс Vanity Fair журналига берган интервьюсида маълум қилди.
Граймснинг сўзларига кўра, ота-оналар қизнинг туғилганини атайлаб бир неча ой давомида яширган. Vanity Fair журналисти бола ҳақида суҳбатни ёзиб олиш пайтида унинг йиғлаётганини эшитиб, қиз ҳақида тасодифан билиб олган. Tesla ва SpaceX асосчиси учун бу еттинчи фарзанд.
Қиз суррогат она томонидан туғилди. Унинг исми — Экза Дарк Сайдириэль (Exa Dark Sideræl) — қисқача Y.
Граймснинг тушунтиришича, Экза исми экзафлопс ўлчов бирлигини эслатади, Дарк — номаълум ва қора моддага ишора. Сайдириэль эса эльф тилидан таржима қилганда «юлдуз вақти» деган маънони беради. Сўнгги исм, шунингдек, «Узуклар ҳукмдори» китоблари сериясидаги Граймснинг севимли қаҳрамони, узукдан воз кечишга қарор қилган эльф малика Галадриэлга ҳам ишора қилади.
Аввалроқ Илон Маск АҚШни нефть ва газ қазиб олишни оширишга чақиргани хабар қилинганди. Шунингдек, Илон Маск Россия ОАВни Starlink орқали блоклашдан бош тортгани ҳақида хабар берилди.
