Jaguar Land Rover компанияси (JLR) савдо муаммолари туфайли Россияга автомобиль етказиб беришни тўхтатди. Бу ҳақда Британия автомобиль ишлаб чиқарувчисининг Россиядаги ваколатхонасига таяниб Autonews хабар берди.

«Ҳозирги глобал контекст бизга савдо муаммоларини ҳам келтириб чиқармоқда, шу сабабли биз Россия бозорига автомобиль етказиб беришни тўхтатмоқдамиз ва вазиятни доимий равишда кузатиб борамиз», дейилади компания баёнотида.

Буюк Британиянинг корхона, энергетика ва саноат стратегияси вазири Кваси Квартенг қарорни олқишлаб, JLR Украинадаги махсус операция туфайли Россияни изоляция қилиш истагини қўллаб-қувватловчи шиддат билан ўсиб бораётган компаниялар қаторига кирганини таъкидлади.

Бундан олдин бошқа бир қатор йирик автомобиль ишлаб чиқарувчилари Россияга етказиб беришни тўхтатганини маълум қилган эди. Volvo «потенциал хавф ва санкцияларни ҳисобга олган ҳолда» Россия бозорига автомобиль етказиб беришни кейинги огоҳлантиришгача тўхтатиб туришини айтди.

Volkswagen автоконцерни етказиб беришни вақтинчалик тўхтатганини эълон қилиб, улар АҚШ ва ЕИ томонидан жорий этилган санкциялар оқибатлари аниқ бўлгач, қайта тикланишини таъкидлади. Россияга автомобильлар экспорти General Motors томонидан тўхтатилди, «КамАЗ» билан ҳамкорлик эса Daimler Truck томонидан тўхтатилди.

Аввалроқ йирик автоконцернлар Россияга автомобиль етказиб беришни тўхтатгани хабар қилинганди. Шунингдек, «Формула-1» Россия Гран-присини бекор қилгани ҳақида хабар берилди.