SpaceX асосчиси Илон Маскнинг фикрича, унинг миллиардер рақиби Жефф Безос ўзининг Blue Origin компаниясига кўпроқ вақт сарфлаши керак. Бу ҳақда Илон уни «Йил одами» деб эътироф этган Financial Times газетасига берган интервьюсида айтиб ўтди.

«Қайсидир маънода, мен уни (Безос назарда тутилган — таҳр.) Blue Origin’га кўпроқ вақт сарфлашга кўндиришга ҳаракат қиляпман, шунда улар кўпроқ муваффақиятга эриша олади. Бир дўстим айтганидек, [Безос] Blue Origin’да кўпроқ ва жакузида камроқ вақт ўтказиши керак», — дейди Маск.

Маскнинг сўзларига кўра, Amazon асосчиси муҳандислик соҳасида «етарли даражада яхши», лекин муҳандисликнинг майда тафсилотларини ўрганиш учун ақлий кучини беҳуда сарфлашни истамайди.

CNBC маълумотларига кўра, яқин вақтгача Жефф Безос ҳафтада бир кун — чоршанбани Blue Origin’да ўтказар эди, аммо сентябрда у бу вақтни икки кунга кўпайтиришга қарор қилган ва энди компания ишлари билан чоршанба ва сешанба кунлари шуғулланмоқда.

Маск, ўз навбатида, Tesla ва SpaceX ўртасида ўз вақтини тенг тақсимлашга ҳаракат қилаётганини, бироқ вақти-вақти билан вазият ўзгариб туришини айтган. Миллиардер, шунингдек, баъзида ҳафтасига 120 соат ишлашини таъкидлаган. Шу билан бирга у бундай режим одамни ақлдан оздириши мумкинлигини тан олган. Маск Financial Times’га берган интервьюсида энди дам олиш кунисиз ҳафтасига 80-90 соат ишлаётганини маълум қилган.

Маълумот ўрнида, Маск ва Безос ўртасидаги космик пойга бир неча йиллардан бери давом этмоқда. Ҳозиргача Маскнинг қўли баланд келяпти. Унинг компанияси, аллақачон, Ой ва Марсга парвозлар учун ракетани синовдан ўтказмоқда, шунингдек, мунтазам равишда NASA билан шартномалар тузмоқда.

Аввалроқ Илон Маск Financial Times газетаси томонидан «Йил одами» деб топилгани хабар қилинганди. Бунга қадар, SpaceX асосчиси Time томонидан ҳам «Йил одами» деб топилган эди.