Маскнинг Twitter’ни сотиб олишдан бош тортгани юзасидан тезлаштирилган суд ўтказилади
Twitter суд жараёнини сентябрь ойида ўтказишни сўрамоқда.
АҚШнинг Делавэр штатидаги Адолат суди Twitter вакиллари билан учрашиб, уларнинг Илон Маскка қарши суд жараёнини тезлаштириш ҳақидаги илтимосини маъқуллади. Бу ҳақда Bloomberg нашри хабар бермоқда.
Судья Кетлин МакКормикнинг қарорига кўра, Tesla раҳбарининг ижтимоий тармоқни сотиб олишдан бош тортгани билан боғлиқ Twitter даъвоси бўйича суд жараёни октябрь ойида бўлиб ўтади.
Twitter суд жараёнини сентябрь ойида ўтказишни сўрамоқда.
МакКормик шартнома бўйича узоқ муддатли «ноаниқлик»нинг давом этиши Twitter’га зарар етказмоқда, деган хулосага келди.
Судьянинг таъкидлашича, Маскнинг адвокатлари суднинг 2023 йил февралида ўтказилишини талаб қилиб, суднинг йирик битимлар бўйича мураккаб ҳуқуқий низоларни «тез ҳал эта олиш қобилиятини етарлича баҳоламаган».
«Суд қарори Twitter’нинг эрта ғалабаси бўлиб, кўплаб ҳуқуқшуносларнинг фикрига кўра, Маск мағлуб бўлади», деб ёзади Bloomberg.
Нашрнинг таъкидлашича, Twitter акциялари суд қароридан кейин 5,4 фоизга ошган.
Маск 2021 йил апрель ойида Twitter’ни 44 миллиард долларга сотиб олишга рози бўлди, бироқ кейинчалик ижтимоий тармоқни маълумотларни, жумладан, спам-ботлар фоизини яширишда айблади ва июль ойи бошида келишувдан воз кечишини эълон қилди.
Twitter 13 июль куни суд орқали тадбиркордан ижтимоий тармоқни 44 миллиард долларга сотиб олишни якунлашни талаб қилиб, уни тармоқ ва унинг акциядорлари олдидаги мажбуриятларини бажармаганликда айблади.
Шартнома шартларига кўра, Маск харидни бекор қилиш учун 1 миллиард доллар тўлаши керак. Шунингдек, агар келишувдан чиқиш сабаби компаниянинг асосий фаолияти билан боғлиқ бўлмаса, Маск Twitter’ни харид қилишга мажбурланиши мумкин. Бошқа вариант эса келишув бўлиб, сотиб олиш нархини қайта кўриб чиқилиши ёки Маск ижтимоий тармоққа ҳеч қандай компенсациясиз тўламасдан битимни бекор қилиши мумкин.
Маскнинг адвокатлари Twitter даъвоси бўйича суд мажлисини кейинга қолдиришни сўради.
Twitter Маскнинг «оммавий томоша» уюштирганини ва унинг келишувни бузиши «Twitter ва унинг бизнесига соя солаётганини» таъкидлади. Ижтимоий тармоқ баёнотида айтилишича, Маскнинг келишувни бекор қилмоқчи бўлиши сабаблари, хусусан, Twitter’да ботларнинг кўплиги «баҳона»дан бошқа нарса эмас.
Миллиардер суд ишига «Оҳ, тақдирнинг ҳазили» ибораси билан муносабат билдирди.
«Улар мени Twitter’ни сотиб ололмайди деди. Ўшанда улар ботлар ҳақидаги маълумотларни ошкор қилмаслигини айтмади. Энди улар мени суд орқали Twitter’ни сотиб олишга мажбурламоқчи. Ва улар судда ботлар ҳақидаги маълумотларни ошкор қилиши керак», — деб ёзган SpaceX раҳбари ижтимоий тармоқдаги саҳифасида.