Ўзбекистон энергетика соҳасида кадрлар тайёрлашда Франция билан ҳамкорлик қилади
Ҳамкорлик Франциянинг ENEDIS компанияси кўмагида амалга оширилиши режалаштирилмоқда.
Ўзбекистон энергетика соҳасида кадрлар тайёрлашда Франциянинг ENEDIS компанияси билан ҳамкорлик қилади. Бу ҳақда «Дунё» ахборот агентлиги хабар берди.
Маълум қилинишича, Ўзбекистон элчихонаси ходимлари энергетика соҳасида миллий кадрларни замонавий амалиёт асосида тайёрлаш тизимини такомиллаштириш мақсадида Луара водийси Амалий фанлар миллий мактаби (Institut National des Sciences Appliquées — INSA) директори Янн Шамаяр ва Франциянинг етакчи энергетика компанияларидан бири — ENEDIS вакиллари билан учрашув ўтказган.
Ўзбекистон раҳбарияти томонидан иқтисодиётнинг турли соҳалари учун малакали кадрларни тайёрлаш бўйича олиб борилаётган ислоҳотлар ҳақидаги маълумот тақдим қилинган. Энергетика давлатни жадал ривожлантириш борасидаги стратегик йўналишлардан бири бўлгани сабабли ушбу соҳага малакали кадрларни тайёрлаш муҳим аҳамият касб этиши алоҳида таъкидланган.
Амалий фанлар миллий мактаби директори Янн Шамаяр Ўзбекистонда энергетика соҳаси учун мутахассисларни тайёрлашга берилаётган эътиборни эътироф этган. Шунингдек, республиканинг тегишли ташкилотлари ва ўқув муассасалари билан ушбу йўналишда ҳамкорлик қилишга тайёр эканини билдирган.
Унинг маълумотига кўра, ҳозирги кунда INSA’да 1 минг 660 нафар талаба таҳсил олмоқда. Уларнинг 17 фоизини хорижий мамлакатлар фуқаролари ташкил этади. Чет эллик ёшларнинг ўқиши ва яшаши билан боғлиқ харажатлар Франция ҳукумати томонидан бериладиган стипендиялар ва Европа Иттифоқининг Erasmus дастури орқали молиялаштирилмоқда.
Институт илмий-тадқиқот ишларига ҳам катта эътибор қаратади. Унинг ҳудудида 2 та лаборатория мавжуд. Таълим даргоҳи халқаро ҳамкорлик йўналишини ҳам яхши йўлга қўйган. Айни пайтда Бразилия, Италия, Марокко, Хитой, Янги Зеландия таълим даргоҳлари билан мустаҳкам алоқалар ўрнатилгани таъкидланган. Вьетнамда эса институтнинг филиали очилган.
Миллий мактаб вакиллари Ўзбекистон билан «энергетика муҳандислиги» соҳасида малакали кадрларни тайёрлаш бўйича ҳамкорлик қилишдан манфаатдор эканини таъкидлаган. Ушбу йўналишдаги ҳамкорлик ENEDIS энергетика компанияси кўмагида амалга оширилиши режалаштирилмоқда.
Аввалроқ Erasmus+ Ўзбекистон билан ҳамкорлик лойиҳаларига 11,5 миллиард доллар ажратгани хабар қилинганди. Шунингдек, Ўзбекистон ва Франция коррупцияга қарши курашиш бўйича ҳамкорлик қилиши ҳақида хабар берилди.
