«Қора бозор»: Россияликлар Telegram’да валюта савдосини бошлади
Валюта айирбошлаш каналларидаги доллар ёки евронинг нархи 200 рублга етади.
Россияда банклар томонидан нақд пул сотишнинг тақиқланиши фонида ижтимоий тармоқлар ва мессенжерларда валюта айирбошлаш бўйича гуруҳлар пайдо бўла бошлади. Бу ҳақда «Коммерсантъ» ёзмоқда.
Маълумотларга кўра, Telegram’да «валюта айирбошлаш», «доллар сотиб олиш» ёки «Москва валюта биржаси» сўровларининг ўзида ўнлаб каналларни топиш мумкин.
Ушбу каналларнинг аксарияти март ойининг биринчи икки ҳафтасида яратилган ёки фаоллаштирилган. Айрим каналлар «доллар сотиб олиш мумкин бўлган жойлар тўғрисида долзарб маълумотларни» эълон қилиб, қайси алмаштириш нуқталаридан ва қандай нархда чет эл валютасини сотиб олиш мумкинлиги ҳақида ахборот беради.
Шунингдек, шаҳарлар бўйича гуруҳлар мавжуд бўлиб, уларда иштирокчилар валютани маълум бир нархда сотишни таклиф қилади ёки уларга қанча валюта кераклиги ва қанча тўлашга тайёрлигини ёзади. Бундай гуруҳлардаги нарх ёрлиғи бир доллар ёки евро учун 200 рублга етади.
«Соя сегменти доимо инқирозлар келганда пайдо бўлади, мисол сифатида 2008 ва 2014 йилларни эслашимиз мумкин. Ўшанда бу дўстлар, танишлар, шунчаки Интернет сайтлари бўлиши мумкин эди. Ҳозир эса уларнинг ўрнини Telegram каналлари эгаллади. Шакл ўзгаради, лекин маъно ўзгармайди. Шунингдек, бу ҳаракатларнинг барчаси ноқонунийдир», — деди Pen & Paper адвокатлар уюшмаси ҳамкори Станислав Данилов.
Forward Legal ҳуқуқшуноси Тимур Тажировнинг огоҳлантиришича, Россияда ноқонуний валюта айирбошлаш учун маъмурий жавобгарлик ноқонуний валюта олди-сотдиси суммасининг 75 фоизидан 100 фоизигача бўлган миқдордаги жарима кўринишида назарда тутилади.
«Шундай қилиб, қоидабузарлар қора бозорда айирбошланадиган барча валютани йўқотиши мумкин», — деди эксперт.
Аввалроқ Россиянинг 300 миллиард долларлик олтин-валюта захираси музлатилгани сабабли қарзларни тўлашда муаммолар юзага келаётгани хабар қилинганди. Шунингдек, Ҳиндистон ва Россия ҳисоб-китобларни рупий ва рублда амалга оширишга ўтиши мумкинлиги ҳақида хабар берилди.