Россиялик миллиардер Сулаймон Керимовнинг ўғли Саид Керимов Европа Иттифоқи санкциялари қўлланиши мумкинлиги ҳақидаги хабарлар арафасида Россиядаги энг йирик олтин қазиб олувчи «Полюс» компаниясидаги улушини назорат остидаги 46,35 фоизгача камайтирди. Бу ҳақда компания матбуот хизмати хабар берди.

Маълум қилинишича, Керимовнинг «Вандл Холдингс Лимитед» компанияси «Полюс»даги яна 29,99 фоиз улушини Ахмет Паланкоевга тегишли «Акропол гуруҳи»га сотган. Паланкоев Ростов вилоятидаги юқори навли антрацит кўмирининг йирик ишлаб чиқарувчиси «Донуголь» компаниясининг назорат акциядори ҳисобланади.

«Битим 31 март куни Федерал монополияга қарши хизмат томонидан тасдиқланганидан кейин 4 апрель куни амалга оширилди», дейилади баёнотда.

Саид Керимов 4 апрель куни «Полюс» директорлар кенгашини ҳам тарк этганди. Аввалроқ Financial Times газетаси сенаторнинг ўғли «Сбербанк» раҳбари Герман Греф ва бизнесмен Олег Дерипаска билан бирга 6 апрель куни ЕИ санкциялар рўйхатига киритилиши мумкинлиги ҳақида хабар берган эди.

Маълумот ўрнида, «Полюс» — Россиядаги энг йирик олтин ва дунёдаги тўртинчи йирик қазиб олувчи компания. «Полюс» активлари Красноярск ўлкаси, Якутия, Иркутск, Магадан ва Амур областларида жойлашган.

«Полюс»нинг тасдиқланган ва тахминий олтин заҳиралари 2020 йил 31 декабрь ҳолатига кўра 104 миллион унцияни ташкил этди. 2021 йилда компания 2,72 миллион унцияга яқин олтин қазиб олди ва қайта ишлади.

Аввалроқ Роман Абрамович Forbes’нинг энг бой спорт клублари эгалари рўйхатидан чиқиб кетгани хабар қилинганди. Шунингдек, Алишер Усмонов ҳамкорлари билан олтинга сармоя киритиш бўйича ширкат тузгани ҳақида хабар берилганди.