Олий Мажлис Сенати Раиси биринчи ўринбосари Содиқ Сафоев 23 ноябрь куни Европа тикланиш ва тараққиёт банки Марказий Осиё бўйича бошқарувчи директори Жужанна Харгитай билан учрашув ўтказди. Бу ҳақда юқори палата матбуот хизмати хабар берди.

Маълум қилинишича, учрашувда Ўзбекистон ва халқаро молия муассасаси ўртасидаги ҳамкорликнинг бугунги ҳолати ва истиқболлари муҳокама қилинган. Шунингдек, ЕТТБ вакили Ўзбекистонда хорижий инвестицияларни жалб қилиш бўйича амалга оширилаётган ислоҳотлар, банк-молия ва солиқ тизимларидаги ўзгаришлар, пул-кредит сиёсатини мустаҳкамлашга қаратилаётган эътиборга юқори баҳо берган.

Қайд этилишича, томонлар Ўзбекистонда халқаро ташкилот иштирокида амалга оширилаётган ва истиқболда режалаштирилаётган ижтимоий-иқтисодий ва инфратузилма лойиҳаларининг параметрларини муҳокама қилган. Шунингдек, молиявий барқарорликни мустаҳкамлаш, суғурта бозорини ривожлантириш ва томонларни қизиқтирган бошқа масалалар кўриб чиқилган.

Мулоқот якунида томонлар ҳамкорликни мустаҳкамлашга тайёр, икки томонлама муносабатларни кенгайтиришдан манфаатдор эканини билдирган.

Аввалроқ Сардор Умурзоқов ЕТТБ делегацияси билан молия сектори ва капитал бозори бўйича ҳамкорликни муҳокама қилгани ҳақида хабар берилганди. Шунингдек, Бизнес-омбудсман БМТ ва ЕТТБ билан коррупцияга қарши ҳамкорлик олиб бориши хабар қилинди.