Жефф Безос Обама фондининг лидерлик дастурига 100 млн доллар хайрия қилди
Бу фондга қўшилган барча даврлардаги энг катта ҳиссадир
Жефф Безос АҚШнинг 44-Президенти Барак Обама фондининг Глобал лидерлик дастурига 100 миллион доллар хайрия қилди. Бу ҳақда фонд матбуот хизмати хабар бермоқда.
Жамғарма маълумотларига кўра, бу фондга қўшилган барча даврлардаги энг катта ҳиссадир. Безос Чикагодаги Обама президентлик марказидаги майдонга 1960-йилларда фуқаролик ҳуқуқлари фаоли ва конгрессмен Жон Льюис номини беришни сўради.
«Озодлик курашчилари қаҳрамонлар пантеонида алоҳида ўринга лойиқдир ва мен тақдирланишга Американинг буюк етакчиси, фавқулодда одоб ва жасорат эгаси Жон Льюисдан-да муносиброқ одамни ҳаёлимга ҳам келтира олмайман», — деди Безос.
Қайд этилишича, Обама жамғармаси Безос маблағларидан янги авлод раҳбарларини керакли воситалар, ресурслар ва тренинглар билан таъминлаш учун фойдаланмоқда.
Аввалроқ Amazon асосчиси Жефф Безоснинг The Bezos Earth Fund жамғармаси Рокфеллер фонди ва IKEA’нинг қўшма қайта тикланадиган энергия ташаббусига 500 миллион доллар хайрия қилиши ҳақида хабар берилганди.
