«Апельсин қироли» номини олган бразилиялик миллиардер вафот этди
Апельсин шарбати экспорт қилувчи компанияси сабабли «Апельсин қироли» номини олган бразилиялик миллиардер Хосе Луис Кутрале 75 ёшида вафот этди. Бизнесменнинг бойлиги 1,9 млрд долларга баҳоланган.
Апельсин шарбати экспорт қилувчи Cutrale компанияси ортидан «Апельсин қироли» сифатида танилган бразилиялик миллиардер Хосе Луис Кутрале 75 ёшида вафот этди. Бу ҳақда O Globo нашри хабар берди.
Қайд этилишича, миллиардер сўнгги йилларда ўзи яшаган Лондонда табиий сабабларга кўра оламдан ўтган.
Forbes Real-Time маълумотларига кўра, бразилиялик бизнесмен вафот этган пайтда унинг бойлиги 1,9 миллиард долларга баҳоланган. «Апельсин қироли» энг бой бразилияликлар рўйхатида 25-ўринни эгаллади.
Келиб чиқиши итальян бўлган бразилиялик Кутрале 1946 йилда Сан-Паулуда туғилган ва ўсмирлик чоғида отаси билан маҳаллий бозорда ишлай бошлаган.Хосе Луис Кутрале
Кейинчалик оила апельсин етиштиришни бошлади ва 1967 йилда Cutrale компаниясига асос солди, унинг Араракуарадаги заводи дунёдаги энг йирик шарбат ишлаб чиқарувчилардан бирига айланди.
Folha de S.Paulo газетасининг ёзишича, 2010 йилларнинг бошларида завод дунёдаги ҳар учинчи стаканнинг апельсин шарбатини тўлдирган.
Ҳозирда Cutrale етти бўлимдан иборат (компания 1990 йилларнинг ўрталарида Флоридадаги заводлардан бирини Coca-Cola’дан сотиб олган). Ўрим-йиғим даврида компанияда 18 мингга яқин киши ишлайди.
Аввалроқ АҚШда 2 миллиард доллар солиқ тўламаганликда айбланган миллиардер, Монаконинг энг бой аёли ва Италиянинг энг бой миллиардерларидан бири вафот этгани ҳақида хабар берилганди.