Жаҳон олтин кенгаши (World Gold Council) маълумотларига кўра, 2026 йил июнь ойида жаҳон марказий банклари жами 51 тонна олтин харид қилган.

Маълум қилинишича, июнь ойидаги энг фаол харидорлар қаторида Польша Марказий банки 19 тонна ва Хитой 15 тонна кўрсаткич билан етакчилик қилмоқда. Ўзбекистон эса 9 тонна олтин харид қилиб, учинчи ўриндан жой олган. Шунингдек, харидорлар рўйхатида Қозоғистон 7 тонна ва Иордания 3 тонна билан қайд этилган. Грузия ва Гана банклари ҳар бири 1 тоннадан ўсишни кўрсатган.

Ҳисоботга кўра, мазкур ойда энг кўп олтин сотган давлатлар Россия — 9 тонна ҳамда Туркия — 2 тонна бўлган.

Таъкидланишича, 2026 йилнинг биринчи ярми якунларига кўра, марказий банклар томонидан олтин харид қилиш ҳажми 102 тоннага етган бўлиб, харидлар асосан шаклланаётган бозорга эга мамлакатлар томонидан амалга оширилган.

Ярим йил давомида энг йирик харидорлар рўйхати қуйидагича:

• Польша — 82 тонна;
• Ўзбекистон — 41 тонна;
• Хитой — 40 тонна;
• Қозоғистон — 27 тонна.

Бошқа йирик харидорлар қаторига Чехия 11 тонна, Сингапур 10 тонна, Чили 8 тонна, Иордания ва Гана 6 тоннадан киритилган.

Аввалроқ Ўзбекистон олтин экспортини қисқартириб, газ ва бензин импортини кескин оширгани хабар қилинганди. Январь-июнь ойларида мамлакат ташқи савдо айланмаси ҳажми 41 млрд долларга етган.