Apple электрон қоғоз ишлаб чиқарувчи E Ink компаниясининг мослашувчан рангли экранини синовдан ўтказмоқда. Бу ҳақда The Verge хабар берди.

Экран смартфонлар учун мўлжалланган. Таҳлилчи Мин-Чи Куонинг сўзларига кўра, рангли EPD (Электрон қоғоз дисплей)га зарядни узоқ вақт ушлаб туриш қобилияти учун талаб юқори бўлиши мумкин.

Бозордаги аксарият букланадиган смартфонлар билдиришномаларни текшириш учун кичик ташқи дисплейга эга. Бироқ OLED панелларидан фойдаланадиган Samsung Galaxy Z Fold 3 ва Oppo Find N каби қурилмалар ҳам мавжуд. Apple рақобатчиларидан ҳеч бири E Ink дисплейларидан фойдаланмайди.

Мутахассислар узоқ вақтдан бери Apple букланадиган смартфон устида ишлаётганини айтмоқда. Илгари букланадиган қурилмалар Samsung ва Huawei томонидан чиқарилган. The Verge 2021 йилда компания букланадиган дисплей прототипларини ишлаб чиқаётгани ҳақида ёзган эди.

Таҳлилчи Мин-Чи Куо Apple 2025 йилда 9 дюймли букланадиган дисплейли қурилмани чиқаришини тахмин қилмоқда. Bloomberg’нинг ёзишича, компания 20 дюймли дисплейли қурилмани 2026 йилдан эртароқ тақдим этади.

E Ink апрель ойи охирида букланадиган дисплейларнинг рангли версиясини тақдим этди. Улар саҳифаларни олдинги версияларга қараганда тезроқ юклайди.

Аввалроқ Apple iPod ишлаб чиқаришни тўхтатгани ҳақида хабар берилганди.