Автомобиль эгаларидан фуқаролик жавобгарлиги мажбурий суғурта полисини сўраш бекор қилинади
Вазирлар Маҳкамаси қарорида кўрсатилган тартиб 2022 йил 1 мартдан амалда жорий этилади
Ўзбекистонда транспорт воситалари эгаларининг фуқаролик жавобгарлиги мажбурий суғуртаси тўлиқ электрон полисларда амалга оширилади. Бу ҳақда Молия вазирлиги ҳузуридаги Суғурта бозорини ривожлантириш агентлиги хабар берди.
Маълум қилинишича, 2022 йил 1 мартдан бошлаб ҳайдовчининг йўл-патрул хизмати инспекторига тақдим этилиши лозим бўлган ҳужжатлари ёнида бўлмаган тақдирда мазкур ҳужжатлар махсус планшет қурилмаси ёрдамида идентификация ID-картаси орқали текширилади.
Бунда идентификация ID-картага эга фуқароларга тегишли автомобиль ҳайдовчисидан янги намунадаги ҳайдовчилик гувоҳномаси, транспорт воситасини рўйхатдан ўтказганлик тўғрисидаги, транспорт воситасига эгалик қилиш, эгаси йўқлигида ундан фойдаланиш ёки уни тасарруф этиш ҳуқуқини тасдиқловчи ҳужжатлар талаб этиш бекор қилинади. Шунингдек, транспорт воситалари эгаларининг фуқаролик жавобгарлигини мажбурий суғурта қилиш бўйича суғурта полисини сўраш амалиёти ҳам бекор қилинади.
Вазирлар Маҳкамасининг 2021 йил 15 октябрдаги «Ички ишлар органлари фаолиятига замонавий ахборот технологияларини кенг жорий этиш чора-тадбирлари тўғрисида»гиарорга кўра, 2022 йил 1 январдан бошлаб, транспорт воситалари эгаларининг фуқаролик жавобгарлигини мажбурий суғуртаси тўлиқ электрон полисда, яъни Е-полисда расмийлаштирилади. Мазкур санадан бошлаб, янги суғурта полисларини ягона ахборот тизимига тўлиқ киритмасдан шакллантириш имконияти чекланади.
Суғурта ташкилотлари томонидан расмийлаштирилган суғурта шартномалари ҳамда суғурта даъволари тўғрисидаги маълумотлар ягона ахборот тизимига реал вақт режимида киритилади ва ушбу маълумотлар «Электрон ҳукумат» платформаси орқали Ички ишлар вазирлиги Йўл ҳаракати хавфсизлиги бош бошқармаси ахборот тизимларига тақдим этилади.
Шу сабабли, қоғоз бланкаларда расмийлаштирилган суғурта полислари ҳамда кўриб чиқилган суғурта даъволари тўғрисидаги маълумотлар суғурта ташкилотлари томонидан 2022 йил 1 февралга қадар ягона ахборот тизимига тўлиқ киритилиши таъминланиши шарт.
Аввалроқ «Очиқ бюджет» порталида ғолиб бўлган таклифларни молиялаштиришни онлайн кузатиш мумкин бўлиши ҳақида хабар берилганди.