Беҳзод Ҳамраев бюджет дефицити ошиб кетиши мумкинлигининг сабабларини айтди
Марказий банк раиси ўринбосари Kommers.uz мухбири билан суҳбатда бюджет дефицитининг 2022 йил белгиланган 3 фоиз миқдордан ортиб кетиши мумкинлиги сабабларини келтирар экан, буни «ижтимоий ва бошқа масалалар билан боғлиқ харажатлар кўпайгани» билан изоҳлади.
Марказий банк раиси ўринбосари Беҳзод Ҳамраев бюджет дефицитининг 2022 йил белгиланган 3 фоиз миқдордан ортиб кетиши мумкинлиги сабабларини келтирар экан, буни «ижтимоий ва бошқа масалалар билан боғлиқ харажатлар кўпайгани»га боғлади. Бу ҳақда Kommers.uz мухбири хабар бермоқда.
Беҳзод Ҳамраевнинг айтишича, дефицит ортишининг монетар барқарорликка таъсир қилиши масаласига нима учун дефицит ошяпти, деган саволдан келиб чиқиб жавоб ахтариш керак.
«Бизда 2020 йил пандемия, 2021 йил тикланиш йили бўлди. Адашмасам, 20221 йил йиллик фискал дефицит 5,8 фоизгача чиқди. 2022 йил бошида дефицит 3 фоиз бўлиши белгиланган эди. Молия вазирлиги бу тўғрисида тушунтиришлар бериб боряпти. Менимча, ижтимоий ва бошқа масалалар билан боғлиқ харажатлар кўпайгани ҳисобига дефицит кўпроқ бўлиши мумкин. Лекин агар 4 фоиз бўлса ҳам бу 2021 йилгидан паст бўлади ва секин-секин камайтириб борилади», — дейди у.
Марказий банк раиси ўринбосарининг айтишича, дефицитни 3 фоиз этиб белгилаш аслида 2019 йил режа қилинган.
«Биз дефицитни 3 фоиз этиб белгилашни 2019 йил режа қилгандик, 2020 йил пандемия, 2021 йил тикланиш йили, 2022 йил эса бунақа йил (Россия-Украина уруши ва унинг таъсирлари назарда тутилмоқда — таҳр.) бўляпти. Кўрамиз, 2023 йилда нима бўлади. Лекин, албатта, дефицитнинг 2-3 фоиз бўлгани маъқул», — дейди Беҳзод Ҳамраев.
Аввалроқ, 2021 йил охирида молия вазири Тимур Ишметов 2022 йилдан консолидациялашган бюджет дефицитини 5,5–6 фоиздан 3 фоизга тушириш ва кейинги йиллардан кўрсаткични бу лимитдан умуман оширмаслик кўзда тутилаётганини айтганди.
Молия вазирлигининг «Фуқаролар учун бюджет — 2022» (лойиҳа) нашрида ҳам 2022 йилда консолидациялашган бюджет тақчиллиги 25,5 триллион сўм (ЯИМга нисбатан 3,0 фоиз) миқдорида прогноз қилинганди.