Миллиардер Билл Гейтснинг TerraPower ядровий стартапи биринчи атом электр станциясини (АЭС) қуриш учун АҚШнинг Вайоминг штатидаги Кеммерер кончилар шаҳарчасини танлади. Бу ҳақда CNBC хабар бермоқда.

Маълум қилинишича, қурилиш 4 миллиард долларга тушади. Молиялаштиришнинг ярми TerraPower, ярми АҚШ ҳукумати томонидан амалга оширилади. Завод қурилишидан сўнг Berkshire Hathaway Energy компаниясининг Pacifi Corp бўлими Rocky Mountain Power томонидан бошқарилади.

TerraPower бош директори Крис Левескнинг айтишича, қурилишга 2 минг нафаргача одам жалб қилинади. Левескнинг сўзларига кўра, Кеммерернинг танланиши геологик ва технологик омиллар, жумладан сейсмик шароит ва тупроқ бўйича ҳам мос келган. Шунингдек, ғоя маҳаллий ҳамжамият томонидан ҳам қўллаб-қувватланган. Қурилиш 2028 йилгача якунланиши режалаштирилган.

Хабарга кўра, 1000 МВт (1 ГВт) ўрта катталикдаги шаҳарни қувватлантира олади. Гейтс ўзининг «Иқлим фалокатидан қандай қочиш керак?» китобида кичик шаҳар тахминан 1 МВт қувватда ишлаши мумкинлигини ёзганди. Қурилиш тугагандан сўнг завод 60 йил давомида истеъмолчиларни электр энергияси билан таъминлай олади.

Аввалроқ Билл Гейтс нефть гигантларининг қиймати пасайишини башорат қилганди.