Goldman Sachs инвестициялар банкининг башоратига кўра, биткоин нархи 100 минг доллар даражасидан ўтиб кетиши мумкин. Бу ҳақда Bloomberg хабар берди.

Маълумотларга кўра, биткоин рақамли активларни кенгроқ татбиқ қилиш доирасида олтиндан бозор улушини олишни давом эттиради. Биткоиннинг бозор капиталлашуви 700 миллиард доллардан озроқдир, бу ҳозирда биткоин ва олтиндан иборат бўлган ҳимоя активлари бозори улушининг тахминан 20 фоизини ташкил қилади.

«Инвестициялар учун мавжуд олтиннинг қиймати 2,6 триллион долларга баҳоланмоқда. Агар биткоиннинг жамғарма маҳсулотлари бозоридаги улуши келгуси беш йил ичида ‘гипотетик’ 50 фоизгача кўтарилса, унинг нархи 100 минг доллардан кўпроққа кўтарилади. Умумий йиллик даромади 17–18 фоизни ташкил қилади», — деган Goldman Sachs’нинг глобал валюта биржаси, фоиз ставкалари ва ривожланаётган иқтисодиётлар бўйича департаменти ҳамраиси Зак Пандл мижозларга ёзган эслатмада.

Таъкидланишича, биткоин анчадан бери рақамли олтин деб аталади ва бу тасодиф эмас. Иккала активнинг умумий жиҳатлари жуда кўп: биткоинлар ҳам, қимматбаҳо металлар ҳам фоиз ёки дивидендлар тўламайди ва анъанавий активларнинг хатти-ҳаракатларига тақлид қилмайди. Криптовалюта тарафдорлари биткоин ҳам олтин каби фиат валюталарини мунтазам суиистеъмол қилишдан ҳимоя вазифасини ўтайди.

Маълумот ўрнида, 2021 йил ноябрь ойи бошида биткоин ўзининг қиймат рекордини янгилаб, қарийб 69 минг долларга кўтарилган. Бироқ, ўшандан бери криптовалютанинг қиймати асосан пасайиб бормоқда. 7 январь куни биткоин курси 41 минг доллардан пастга тушиб, 2021 йил сентябридан бери минимал даражага етган. Жиддий ўзгарувчанлик ва ўз қийматининг бир қисмини йўқотишига қарамасдан, биткоин нархи 2016 йилдан бери 4700 фоиздан ортиққа ўсган.

Аввалроқ биткоин нархи сентябрь ойидан бери энг паст даражага тушиб кетгани хабар қилинганди. Шунингдек, Билл Гейтс нефть гигантларининг қиймати пасайишини башорат қилгани ҳақида хабар берилди.