Brent маркали нефть нархи 2014 йилдан бери илк марта 89 доллардан ошди
Умумий ўсиш 2,7 фоизни ташкил этган.
Brent маркали нефть нархи 2014 йилдан бери илк марта 89 доллардан ошди. Бу ҳақда Лондоннинг ICE биржасига таяниб Forbes хабар берди.
Маълумотларга кўра, Brent нефти бир баррель учун 89 доллардан ошган. Бу 2014 йил октябрь ойидан бери максимал кўрсаткич бўлиб, Brent нефтининг март ойидаги фючерслари кетма-кет иккинчи кун давомида етти йиллик рекорд қийматларни кўрсатмоқда.
Умумий ўсиш 2,7 фоизни ташкил этган, Американинг WTI нефти эса 2,9 фоизга ўсган. Brent нархи ўтган ҳафта охиридан кўтарила бошлаган. 18 январь куни Brent фючерсларининг нархи аввалига 87 доллар, кейинроқ бир баррель учун 88 доллардан ошиб, 88,13 долларга етган. Охирги марта Brent’нинг бир баррели 2014 йил октябрь ойида ҳам 88 долларга етган эди.
«Шимолий Атлантика альянси фаолияти юзасидан Россия, АҚШ ва НАТО ўртасидаги геосиёсий қарама-қаршилик нефть нархининг ошишига олиб келди», — дейди «Уралсиб» банкининг нефть ва газ сектори бўйича катта таҳлилчиси Алексей Кокин ва «Альфа-банк» катта таҳлилчиси Никита Блохин.
Таъкидланишича, бозор 17 январь куни Абу-Дабида, шу жумладан ADNOC нефть компанияси объектларига учувчисиз самолёт ҳужуми ҳақидаги хабарга кучли муносабат билдирган. Ал-Мусаффаҳ саноат зонасига уюштирилган ҳужум натижасида учта ёқилғи ташувчи машина ёниб кетган, тўрт киши ҳалок бўлган.
Бундан ташқари, Ямандаги ҳусий исёнчилар ҳужумни улар уюштирганини айтган. Шунингдек, БАА ОПЕКдаги учинчи йирик ишлаб чиқариш давлатидир.
Аввалроқ Миллиардер Рэй Далио нефть ишлаб чиқаришни инфляциянинг ўсишига тўсиқ деб атагани хабар қилинганди. Шунингдек, Билл Гейтс нефть гигантларининг қиймати пасайишини башорат қилгани ҳақида хабар берилди.
